Realizimi i projektit ndërkufitar mes Kosovës dhe Malit të Zi, që do të lidhë Deçanin dhe Plavën, edhe më tej mbetet kërkesë e banorëve të Dukagjinit dhe atyre të Malësisë së Plavës e Gucisë.
Në fakt, një pjesë e kësaj rruge brenda territorit të Kosovës tashmë është ndërtuar por pengesë vazhdon të mbetet Manastiri i Deçanit, i cili vazhdimisht po e kundërshton realizimin e këtij projekti. Banorët e Malësisë kërkojnë një këmbëngulje më të madhe nga Qeveria e Kosovës dhe ajo e Shqipërisë, përballë qeverisë së Malit të Zi, për jetësimin e këtij projekti, që nuk pasqyron vetëm infrastrukturë rrugore por hap drejt zhvillimit ekonomik dhe turizmit.
Tahir Gjonbalaj, aktivist dhe veprimtar i dalluar në Plavë e Guci, thotë se ky projekt përveç se mbetet jetik për komunitetin, është edhe projekt kombëtar, prandaj qeveria e Kosovës bashkë me atë të Shqipërisë duhet të bëjnë më shumë trysni në qeverinë malazeze në mënyrë që të kemi një marrëveshje politike për jetësimin e tij.
“Ky jo vetëm që është një projekt, një objekt infrastrukturor por është edhe një projekt kombëtar i cili do e gjallëronte këtë vend, këtë trevë e cila po boshatiset ditë pas dite. Nëse nuk realizohet ky projekt dhe disa të tjera vetëm munden me folë dikur historianët se në trevat e Plavë e Gucisë ka pasë shqiptarë ose ishin shqiptarë. Fatkeqësisht numri i popullsisë ka ra. Në vitin 1908 vetëm në Guci ishin 23 mijë banorë, e cila ju konkurronte qyteteve të mëdha në Evropë, atëherë ndërsa sot në Guci janë 2000 banorë”, tha Gjonbalaj.
“Kjo trevë ka nevojë për ndihmën e Prishtinës zyrtare, ka nevojë për Deçanin, Pejën. Kemi nevojë për me i lidh edhe më afër, që projekti i filluar qe sa vite të përfundohet edhe kjo trevë përfundimisht të lidhet përmes rrugës Plavë – Deçan edhe me Kosovën në përgjithësi. Rruga Plavë – Deçan është pjesë e Planit Hapësinor që është aprovuar nga Parlamenti i Malit të Zi, dhe ne duhet të japim maksimumin të gjithë që ky projekt të realizohet”, tha Sadri Balidemaj, aktivist nga Martinaj
“Mali i Zi nuk është i interesuar t’i hap këto rrugë, rruga për Deçan, rruga për Çakorr, të hapej këtu për Çerem, ose Vuthaj, Valbonë, dhe kjo do i lidhte njerëzit me rrugë e cila do e shkurton komunikimin, ardhjen, vajtjen. Megjithatë jam i bindur se kjo periudhë do të vij por kam frikë se vonohet”, tha prof. Binak Ulaj, Vuthaj.
Në fakt, një pjesë e kësaj rruge brenda territorit të Kosovës tashmë është ndërtuar por pengesë vazhdon të mbetet Manastiri i Deçanit i cili vazhdimisht po e kundërshton realizmin e këtij projekti.
“Pengon ndërtimin e segmentit rrugor prej 5 km, i cili do të mundësojë një qarkullim më të mirë më të lirë të qytetarëve dhe do të mundësojë investimet në këtë pjesë. Është shqetësim edhe është pengesë politike për ne mosndërtimi i këtij segmenti që është projekti më kapital që e mundëson zhvillimin e turizmit”, tha Adem Lushaj, Deçan.
Realizimi i këtij projekti ndërkufitar rrugën Deçan-Plavë do ta shkurtonte në vetëm 36 km, e që do të ishte i mirëseardhur për zhvillimin ekonomik të të dyja komunave.
