Aktivistja suedeze Greta Thunberg mbërriti në Greqi të dielën, e cila u prit me brohoritje nga një turmë pro-palestineze, pasi autoritetet izraelite e deportuan atë së bashku me qindra aktivistë të tjerë . Ata u arrestuan në det ndërsa përpiqeshin të dërgonin ndihma në Gaza, raporton Reuters. Izraeli konfirmoi të dielën se kishte dëbuar 171 aktivistë, përfshirë Thunberg, duke e çuar numrin e përgjithshëm të të deportuarve në 341.
Sipas njoftimit për shtyp të Ministrisë së Punëve të Jashtme Greke, 161 aktivistë, përfshirë 22-vjeçaren Thunberg, zbarkuan në Athinë të hënën. Në grup kishte 27 shtetas grekë, si dhe aktivistë nga pothuajse 20 vende të tjera.
“Le të jem shumë e qartë. Po ndodh një gjenocid”, i tha Thunberg një turme në aeroportin e Athinës, duke iu referuar operacioneve ushtarake të Izraelit në Gaza. “Sistemet tona ndërkombëtare po i tradhtojnë palestinezët. Ato nuk janë as në gjendje të parandalojnë krimet më të këqija të luftës. Ajo që vendosëm të bënim me Flotiljen Globale Sumud ishte të vepronim kur qeveritë tona dështuan të përmbushnin detyrimet e tyre ligjore.”
Aktivistët janë përpjekur të arrijnë në Gaza me disa anije për të shpërndarë ndihma dhe për të tërhequr vëmendjen ndaj situatës së rëndë humanitare, ku shumica e 2.2 milionë njerëzve janë zhvendosur dhe Kombet e Bashkuara kanë paralajmëruar për një zi buke të përhapur. Izraeli hedh poshtë akuzat për gjenocid dhe thotë se raportet për zi buke janë të ekzagjeruara, dhe e ka karakterizuar flotiljen si një marifet propagandistik në dobi të Hamasit. Thunberg u ndalua më parë në det në një përpjekje të ngjashme për të thyer bllokadën në qershor.
Aktivistët e deportuar pretendojnë se janë abuzuar
Pasi u kthyen në shtëpi, aktivistët zviceranë dhe spanjollë nga flotilja bënë akuza serioze për kushte çnjerëzore gjatë paraburgimit. Nëntë anëtarët e flotiljes që u kthyen në Zvicër përmendën privimin nga gjumi, mungesën e ujit dhe ushqimit, dhe disa pretenduan se ishin rrahur, shqelmuar dhe mbyllur në kafaz.
Një zëdhënës i Ministrisë së Jashtme izraelite i hodhi poshtë akuzat. Pretendime të ngjashme u bënë nga aktivistët spanjollë pas mbërritjes së tyre në Madrid.
“Na rrahën, na zvarritën përtokë, na lidhën sytë, duart dhe këmbët, na futën në kafaze dhe na fyenin”, u tha gazetarëve avokati Rafael Borrego. Aktivistët suedezë thanë gjithashtu të shtunën se Thunberg u shty dhe u detyrua të mbante një flamur izraelit gjatë ndalimit të saj, ndërsa të tjerëve iu mohua ushqimi i pastër, uji, ilaçet dhe sendet personale, thanë ata.
Me të mbërritur në Athinë, Thunberg deklaroi se mund të “fliste për një kohë shumë, shumë të gjatë për abuzimet dhe keqtrajtimin në burg, më besoni, por kjo nuk është historia”. Ajo theksoi se Izraeli kishte shkelur edhe një herë ligjin ndërkombëtar duke penguar ndihmën humanitare të arrinte në Gaza.
Izraeli: Pretendimet janë gënjeshtra të plota
Ministria e Jashtme e Izraelit i përshkroi raportet për abuzimin e të burgosurve si “gënjeshtra të plota”. Një zëdhënës i tha Reuters gjatë fundjavës se të gjithë të burgosurit kishin qasje në ujë, ushqim dhe tualete dhe se “atave nuk u ishte mohuar qasja në këshilla ligjore dhe të gjitha të drejtat e tyre ligjore ishin respektuar plotësisht”.
Ambasada zvicerane në Tel Aviv vizitoi 10 qytetarë të saj të dielën dhe raportoi se të gjithë ishin “në gjendje shëndetësore relativisht të mirë, duke pasur parasysh rrethanat”. Ish-kryetarja e bashkisë së Barcelonës, Ada Colau, e cila ishte gjithashtu në flotë, tha se kishte pasur “abuzime, por nuk është asgjë në krahasim me atë që vuan populli palestinez çdo ditë”.
