Me ftesë të Kryeprokurorit të Republikës së Bullgarisë, Borislav Sarafov, në bashkëpunim me Kryeprokurorin e Republikës së Turqisë, Muhsin Sentürk, ushtruesi i detyrës së Kryeprokurorit të Shtetit, Besim Kelmendi, po merr pjesë në Forumin IV të kryeprokurorëve të Përgjithshëm të shteteve të Ballkanit, që po mbahet në Sofje të Bullgarisë.
Në këtë forum, përveç Kelmendit, po marrin pjesë edhe prokurori i Zyrës së Kryeprokurorit të Shtetit, Aleksandër Lumezi, drejtori i Përgjithshëm i Sekretariatit të Këshillit Prokurorial të Kosovës, Sami Istrefi, si dhe shefi i Kabinetit të u.d. Kryeprokurorit të Shtetit, Ardian Nikolla.
Sipas njoftimit, gjatë sesioneve të forumit, u.d. Kryeprokurori i Shtetit mbajti një fjalë rasti ku theksoi rëndësinë e bashkëpunimit rajonal dhe ndërkombëtar në luftën kundër krimeve transnacionale. Ai vuri në dukje sfidat e krimeve me elemente ndërkombëtare, të cilat kërkojnë veprime të koordinuara dhe të vendosura, duke nënvizuar se asnjë shtet nuk mund t’i përballojë i vetëm këto kërcënime komplekse.
Kelmendi prezantoi gjithashtu arritjet e Prokurorisë Speciale të Kosovës në trajtimin e rasteve të krimit të organizuar dhe terrorizmit, si dhe progresin institucional të Prokurorit të Shtetit në sekuestrimin e pasurive të paligjshme.
“Ai theksoi nevojën për ndërtimin e besimit të ndërsjellë mes prokurorive, avancimin e shkëmbimit të informacioneve, harmonizimin e praktikave dhe forcimin e bashkëpunimit ndërinstitucional dhe ndërkufitar. Për më tepër, bëri thirrje për veprime të koordinuara ndërmjet institucioneve ligjzbatuese të vendeve të Ballkanit”, thuhet në njoftim.
Tutje u tha se U.d. Kryeprokurori Kelmendi theksoi se për arritjen e këtyre qëllimeve duhet vepruar me efikasitet, integritet dhe mirëbesim reciprok, që kërkon jo vetëm vullnet profesional, por edhe mbështetje të ndërsjellë për një rajon më të sigurt, më të drejtë dhe më të integruar.
Në këtë forum, i cili ka për qëllim forcimin e bashkëpunimit të prokurorive të vendeve të Ballkanit në fushën e drejtësisë penale, kanë marrë pjesë edhe kryeministri i Bullgarisë, Rossen Jeliazkov, ministri i Drejtësisë së Bullgarisë, Georgi Georgiev, presidenti i Eurojust-it, Michael Schmid, sekretari i Përgjithshëm i Shoqatës Ndërkombëtare të Prokurorëve, Roel Dona, si dhe kryeprokurorë dhe prokurorë nga vendet e Ballkanit Perëndimor dhe nga vende të tjera si Bullgaria, Turqia, Sllovenia dhe Rumania.
