Në kuadër të aktiviteteve të rregullta për bashkëpunim ndërinstitucional, komandanti i Stacionit Policor “Veriu” në Prishtinë, kapiten Faton Shala, së bashku me stafin komandues, zhvilloi një takim pune me drejtorët e shkollave fillore dhe zyrtarë komunal të Kryeqytetit.
Takimi kishte për qëllim forcimin e bashkëpunimit ndërmjet Policisë së Kosovës dhe institucioneve arsimore, me fokus të veçantë në parandalimin e incidenteve, rritjen e sigurisë në ambiente shkollore dhe mbrojtjen e nxënësve.
Gjatë diskutimeve, palët theksuan rëndësinë e komunikimit të vazhdueshëm ndërmjet policisë, shkollave dhe prindërve, si dhe nevojën për aktivitete sensibilizuese që synojnë edukimin e nxënësve për sjellje të përgjegjshme dhe respektimin e rregullave të rendit publik.
