Presidentja e vendit Vjosa Osmani dhe kryeministri në detyrë, Albin Kurti janë nderuar me çmimin `Alumni i Nderit të Universitetit të Prishtinës` nga Universiteti i Prishtinës.
Rektori i Universitetit të Prishtinës, Arben Hajrullahu, u shpreh se Universiteti i Prishtinës ka qenë dhe vazhdon të jetë shtëpi e shumë njerëzve të ndritur, idealistë.
Ndërsa gjatë fjalimit të saj, Osmani theksoi rëndësinë që ka pasur ky universitet në formimin e saj profesional dhe personal.
“Ka diçka thellësisht të bukur e domethënëse në rikthimin e një ish-studenteje në Universitetin e vet, në vendin ku ëndrrat morën drejtimin e duhur, ku idealet u formësuan dhe ku filloi rrugëtimi për të qenë në shërbim të vendit”, u shpreh ajo.
Presidentja e cilësoi Universitetin e Prishtinës si një “tempull të dijes” dhe një simbol të lirisë së mendimit, debatit dhe kërkimit të së vërtetës. Ajo theksoi se investimi në arsim është investimi më fisnik që mund të bëjë një shtet, pasi ai sjell stabilitet, zhvillim dhe dinjitet.
“UP ka qenë dhe mbetet zemra akademike për shtetin tonë, themeli mbi të cilin së bashku e ndërtojmë të ardhmen”, ka thënë Osmani.
Kurse Kryeministri në detyrë, Albin Kurti, gjatë ceremonisë në Universitetin e Prishtinës, vlerësoi rolin historik dhe shoqëror të këtij institucioni, duke e cilësuar atë si themel të dijes, guximit dhe lirisë.
“Nuk është rastësi që pikërisht 1 tetori, dita kur ju keni filluar vitin e ri akademik, është përcaktuar si dita e studentëve,” tha Kurti, duke theksuar rolin qendror të studentit si mbartës i dijes dhe pjesëmarrës aktiv në ngjarjet historike të vendit.
Duke folur si ish-student i këtij universiteti, Kurti theksoi se Universiteti i Prishtinës ka qenë gjithmonë i lidhur ngushtë me zhvillimet historike dhe shoqërore të Kosovës. “Që nga themelimi i Universitetit nuk ka ngjarje që të mos e ketë zanafillën ose në përmbajtjen e vet emrin e studentit,” tha ai.
Ai shtoi se Universiteti u themelua për të krijuar kuadro profesionale dhe për të qenë bartës të guximit, duke u kthyer në një formë proteste ndaj okupimit dhe sundimit, ku dija bëhet akt i lirisë.
Kurti i bëri thirrje rektorit dhe profesorëve që Universiteti “Hasan Prishtina” të synojë të jetë një ndër dëshmitë më të mëdha ndërkombëtare të Kosovës. “Është detyrë ta bëjmë këtë universitet më të lartin në rajon,” u shpreh ai, duke theksuar se asnjë universitet tjetër në rajon nuk ka një lidhje kaq të fortë me ekzistencën politike dhe publike të shtetit siç ka Universiteti i Prishtinës me Republikën e Kosovës.
