Gjykata Themelore në Ferizaj ,Departamenti për Krime të Rënda, ka shpallur aktgjykim dënues ndaj të pandehurit F.I., për veprën penale në vazhdim “Vrasje e rëndë në tentativë”, dhe e ka dënuar me 12 vite burgim.
Trupi gjykues i kryesuar nga gjyqtarja Fitore Krivanjeva – Daci, pas pranimit të fajësisë nga i pandehuri, e ka shpallur atë fajtor për veprën penale të vrasjes së rëndë në tentativë, sipas nenit 173 paragrafi 1, nënparagrafi 1.10, lidhur me nenet 28 dhe 77 të Kodit Penal të Republikës së Kosovës (KPRK).
Në dënimin me burg do t’i llogaritet edhe koha e kaluar në paraburgim, ndërsa ekzekutimi i plotë i dënimit do të bëhet pas plotfuqishmërisë së aktgjykimit.
Sipas aktakuzës, më 11 nëntor 2024, brenda një harku kohor prej pak minutash në Ferizaj, i pandehuri ka tentuar të privojë nga jeta katër persona, për shkak të përkatësisë së tyre etnike, përkatësisht pjesëtarë të komuniteteve ashkali, egjiptian dhe romë.
Rasti i parë ka ndodhur rreth orës 15:29, në rrugën “R.B.”, kur ai sulmoi me thikë dy vajza të mitura (10 dhe 14 vjeç), duke i shkaktuar njërës lëndime të rënda trupore që rrezikuan jetën, ndërsa tjetrës lëndime të lehta.
Rreth orës 15:30, në rrugën “E.T.”, sulmoi një burrë 32-vjeçar me thikë, duke i shkaktuar lëndime të lehta në kokë dhe fytyrë.
Kurse rreth orës 15:53, në rrugën “H.S.”, sulmoi me thikë një burrë 29-vjeçar që ishte me karrocë, duke i shkaktuar lëndime të rënda trupore që rrezikuan jetën.
“Konform nenin 366 paragrafi 5 dhe 6 lidhur me paragrafin 1 nën paragrafi 1.1 të KPPRK-së, të pandehurit i vazhdohet masa e paraburgimit deri kur aktgjykimi të merre formën e prerë, por jo më shumë se koha e dënimit të shqiptuar në aktgjykim. Konform nenit 270 paragrafi 1 të KPPK-se, konfiskohet ne mënyrë te përhershme thika e markës “Berlinger House”, si objekt i kryerjes së veprës penale”, thuhet në njoftim
