Presidenti i Shteteve të Bashkuara të Amerikës, Donald Trump, propozoi sot që NATO të shqyrtojë përjashtimin e Spanjës, sepse ajo mbetet prapa anëtarëve të tjerë për sa i përket shpenzimeve ushtarake.
Në qershor, anëtarët e aleancës, e cila financohet më shumë nga SHBA-të, ranë dakord të rrisin ndjeshëm shpenzimet ushtarake, në pesë përqind të produktit të brendshëm bruto. Kështu, kërkesa e Trump që anëtarët evropianë të shpenzojnë më shumë për mbrojtjen e tyre u pranua.
Por kryeministri spanjoll Pedro Sanchez tha në atë kohë se nuk do të angazhohej për objektivin prej pesë përqind, duke e quajtur atë “të papajtueshëm me shtetin tonë të mirëqenies dhe vizionin tonë për botën”.
“Ndoshta duhet t’i dëboni nga NATO”
Në një takim në Zyrën Ovale me udhëheqësin e anëtarit të dytë më të ri të NATO-s, presidentin finlandez Alexander Stubbs, Trump tha se udhëheqësit evropianë duhet ta bindin Spanjën të rrisë angazhimin e saj ndaj aleancës.
“Do të duhet të filloni të flisni me Spanjën,” tha Trump. “Duhet t’i telefononi dhe të zbuloni pse po vonojnë.”
“Ata nuk kanë asnjë justifikim për të mos e bërë, por kjo është në rregull. Sinqerisht, ndoshta duhet t’i dëboni nga NATO”, shtoi presidenti i SHBA-së.
Spanja iu bashkua Organizatës së Traktatit të Atlantikut të Veriut në vitin 1982. Aleanca perëndimore me 32 vende për mbrojtje dhe parandalim të ndërsjellë ka qenë në qendër të vëmendjes që kur Rusia pushtoi Ukrainën në vitin 2022, duke shkaktuar luftën më vdekjeprurëse tokësore në Evropë që nga Lufta e Dytë Botërore.
