TIRANË, 11 tetor /ATSH/ Kombëtarja shqiptare e futbollit ka fituar 0-1 mbrëmjen e sotme ndaj Serbisë në stadiumin “Gradski stadion Dubočica”, në Leskovac, sfidë kjo e vlefshme për Grupin K kualifikues të Kupës së Botës.
Fitorja e kuqezinjve erdhi pas golit të shënuar nga sulmuesi Rey Manaj në minutën e fundit të pjesës së parë.
Presidenti i Republikës, Bajram Begaj ndau në rrjetet sociale emocionet e golit të Rey Manaj, duke uruar fitoren e kuqezinjve.
Begaj theksoi se, ekipi ynë kombëtar solli sonte gëzim dhe krenari në çdo zemër shqiptare.
“Shqipëri – Serbi 1 : 0 Ekipi ynë kombëtar solli sonte gëzim dhe krenari në çdo zemër shqiptare! Një ndeshje që do të mbahet mend gjatë, fitorja e flamurit kuqezi”, shkroi Begaj.
Shqipëria renditet e dyta në grupin K të eliminatoreve të Botërorit 2026 me 11 pikë pas 6 ndeshjeve, ndërsa Serbia renditet e treta me 7 pikë pas 5 ndeshjeve.
Grupi kryesohet nga Anglia me 15 pikë pas 5 ndeshjeve. Ekipi i renditur i dyti në grup shkon në “play off”-in për Botërorin 2026.
Fitorja në këtë ndeshje shënon një hap të madh drejt kualifikimit për Kupën e Botës 2026, që do të zhvillohet në SHBA-Kanada dhe Meksikë.
