Kandidati për kryetar të Mitrovicës së Jugut nga Lëvizja Vetëvendosje, Faton Peci ka falënderuar qytetarët për besimin e mbështetjen që thotë se mori në procesin e djeshëm zgjedhor.
“Dua t’ju falënderoj gjithsecilin dhe gjithsecilën prej jush për qytetarinë e lartë të treguar dje dhe përgjatë gjithë kësaj fushate. Faleminderit për qëndresën dhe qartësinë, për besimin dhe mbështetjen në ditën e votimit, te kutia e votimit”, ka shkruar Peci.
“Le të presim deri në numërimin edhe të votës së fundit”, ka shkruar kandidati i Vetëvendosjes për Mitrovicën e Jugut, derisa ka thënë se interesi i qytetarëve të Mitrovicës është mbi të gjitha.
Ai nuk la pa i komentuar rezultatet e raportuara një ditë më parë për këtë komunë.
“Një gjë është e qartë: Mitrovica nuk u thye! Interesat në Mitrovicë janë të mëdha, dhe kjo e arriti kulmin e shpërfaqjes dje nga çfarë dhe si u raportua për rezultatin zgjedhor. Por interesi i Mitrovicës dhe qytetarëve të saj është mbi të gjitha, e bashkë me ju do ta mbrojmë dhe përparojmë atë”, ka shkruar Peci, i cili bazuar në rezultatet e publikuara nga KQZ-ja është radhitur i dyti me pak dallim në vota nga kundër kandidati i tij nga PDK-ja.
Nga 100 për qind e numërimit të vendvotimeve për këtë komunë, Peci sipas KQZ-së ka marrë 47,80 për qind të votave apo 15 mijë e 340 vota.
