HAMAS-i liroi pengjet e fundit izraelite të gjallë nga Gaza në përputhje me marrëveshjen e armëpushimit, dhe Izraeli dërgoi në shtëpi autobusë plot me të burgosur palestinezë, ndërsa Presidenti i SHBA-së Donald Trump shpalli fundin e luftës dyvjeçare dhe nënshkroi një deklaratë paqeje në Egjipt, së bashku me vendet ndërmjetëse – Katarin, Egjiptin dhe Turqinë.
Donald Trump e shpalli 13 tetorin një “ditë të jashtëzakonshme” për botën dhe Lindjen e Mesme, dhe kancelari gjerman Friedrich Merz beson se kjo e hënë “do të mbetet një datë e rëndësishme në librat e historisë”.
Shtëpia e Bardhë njoftoi një marrëveshje të nënshkruar në Egjipt më herët gjatë ditës së sotme, të quajtur “Marrëveshja e Paqes e Trump”, duke formalizuar një plan për të arritur paqen në Lindjen e Mesme.
Deklarata u nënshkrua nga Presidenti i SHBA-së Donald Trump, Presidenti i Egjiptit Abdel Fattah el Sisi, Emiri i Katarit Tamim bin Hamad Al Thani dhe Presidenti turk Rexhep Tajip Erdogan, duke u zotuar për një “angazhim vërtet historik” për zbatimin e marrëveshjes.
Marrëveshja shënon fundin e më shumë se dy viteve konflikt dhe përshkruan një vizion të një rajoni “të shënuar nga shpresa, siguria dhe aspiratat e përbashkëta për paqe dhe prosperitet”, megjithëse nuk përmban detaje konkrete të zbatimit.
“Ne e kuptojmë se një paqe e qëndrueshme do të jetë ajo në të cilën palestinezët dhe izraelitët mund të lulëzojnë, me të drejta themelore, siguri dhe dinjitet të garantuar”, thuhet në tekstin e marrëveshjes.
Dokumenti përsërit angazhimin se të gjitha mosmarrëveshjet e ardhshme do të zgjidhen përmes kanaleve diplomatike, jo përmes konfliktit të armatosur. “Ky është një kapitull i ri për rajonin”, përfundon deklarata.
