Në konferencën ndërkombëtare “Expand to US + AI Conference 2025”, Presidentja e vendit, Vjosa Osmani, tha se sukseset e Kosovës në sektorin e inovacionit dhe teknologjisë janë rezultat i një gjenerate që ka refuzuar të definohet nga kufizimet dhe që me guxim po hap dyer të reja në skenën botërore.
Presidentja theksoi se fokusi i konferencës inteligjenca artificiale po transformon çdo aspekt të jetës dhe shoqërisë, nga arsimi e deri te siguria. Ajo nënvizoi rëndësinë që kjo teknologji të përdoret për të fuqizuar njerëzit dhe jo për t’i zëvendësuar ata, duke theksuar se vizioni i Kosovës është që teknologjia të reflektojë vlerat e vendit dhe të krijojë mundësi, jo pabarazi.
Osmani bëri thirrje për gjithëpërfshirje në sektorin e teknologjisë, duke theksuar se e ardhmja duhet t’i japë secilës grua një ulëse në tryezat ku merren vendimet, sepse gratë, siç tha ajo, udhëheqin me standard dhe inovacion.
Duke përmendur CreativeHub si shembull të një vizioni përfshirës, presidentja Osmani tha se kjo iniciativë, e vetmja shkollë e akredituar në Miami dhe Prishtinë, ka rol të rëndësishëm në ndërlidhjen e Kosovës me ekosistemin global të inovacionit dhe ndërtimin e urave përtej Atlantikut.
Ajo bëri të ditur se në vitin 2026, një grup biznesesh nga Kosova do të udhëtojë në Miami për të ndërtuar partneritete të reja dhe për të prezantuar potencialin e Kosovës në tregun amerikan, duke dëshmuar se vendi është gati të garojë dhe të udhëheqë në skenën globale.
Në fund, Osmani theksoi se resursi më i madh shtetëror i Kosovës është potenciali i të rinjve, kreativiteti dhe liria e tyre, duke e cilësuar Kosovën si një shtet të ndërmarrësve, inxhinierëve e shkencëtarëve që po e ridefinojnë identitetin e saj në botë. Ajo ftoi pjesëmarrësit e konferencës që ta shohin këtë ngjarje si mundësi për bashkëpunim dhe ndërtim të një vizioni të përbashkët për progres përtej kufijve dhe kulturave.
