Kryeministri shqiptar, Edi Rama, ka reaguar ndaj Lëvizjes Vetëvendosje të Albin Kurtit, në lidhje me protestën e nesërme në Tiranë, e cila synon të kërkojë drejtësi për krerët e UÇK-së që po mbahen në paraburgim në Hagë.
Lëvizja Vetëvendosje, në një komunikatë për media dje, e ka përkrahur protestën në Tiranë, por ka thënë se institucionet e Shqipërisë, si shtet anëtar i OKB-së, i Këshillit të Evropës, i OSBE-së, i NATO-s e shumë pranë Bashkimit Evropian, kanë përgjegjësi dhe mundësi që këtë çështje ta ngrejnë në këto forume ndërkombëtare, aty ku flitet e vendoset për drejtësi, e jo në sheshin “Skënderbej” në Tiranë.
Sipas VV-së, para se të protestojnë, aktorë dhe politikanë duhet të tregojnë të paktën një minimum pendese për qëndrimet e tyre të gabuara në të kaluarën.
“Një shembull i qartë është vetë Kryeministri aktual i Shqipërisë, Edi Rama, i cili madje kishte ardhur në Kosovë në vizitë emergjente me helikopter për të bindur palët këtu që të votonin pro themelimit të kësaj Gjykate”, ka thënë LVV.
Për këtë ka reaguar kryeministri shqiptar Edi Rama, duke thënë se nuk është në garë me Vetëvendosjen për balotazhin, ndërsa ka theksuar se ka folur publikisht për zhvillimet në Hagë sa herë që ka pasur rastin.
“Lëvizja Vetëvendosje më paska kushtuar një çarçaf të gjatë, ku shkruan se para 10 vitesh unë paskam qenë pro, ndërsa ajo paskësh qenë kundër Gjykatës Speciale… Ndërkohë, unë e kam denoncuar farsën ndaj Hashim Thaçit dhe të tjerëve sa herë dhe kudo që ka qenë rasti apo nevoja. Ndërsa Lëvizja, dihet se sa ka lëvizur në atë drejtim. Por unë nuk jam në asnjë garë me Lëvizjen dhe më vjen keq që ajo i ngatërron marrëdhëniet institucionale të Kosovës me Shqipërinë në çorbën e balotazheve komunale”, ka thënë Rama.
Rama ka kujtuar qëndrimet e së kaluarës të Vetëvendosjes, duke thënë se “për qëndrimet e para 10 vjetëve, kur ajo nuk e njihte as himnin e Kosovës, e jo më pafajësinë e Hashim Thaçit, të cilin do ta donte përjetësisht në Hagë, i kujtoj Lëvizjes se Gjykata Speciale u ngrit për akuzat për trafikim organesh, jo për të marrë peng Presidentin e Republikës së Kosovës.”
Rama gjithashtu ka sqaruar pozicionin e tij lidhur me protestën:
“Dhe për në fund, unë as nuk jam organizator, as folës i protestës gjithëkombëtare ‘Drejtësi për Çlirimtarët’, të cilën e mbështes me gjithë zemër. Do t’i bashkohesha si pjesëmarrës i thjeshtë, nëse nuk do të isha i vetëdijshëm se çdo politizim, qoftë me dashje apo pa dashje, i kësaj nisme, do të dëmtonte qëllimin dhe popullaritetin e saj”, ka theksuar kryeministri Rama.
