Presidenti i Shqipërisë, Bajram Begaj, ka shprehur mbështetjen e tij për protestën gjithëpopullore që u mbajt në sheshin “Skënderbej” në Tiranë, në mbështetje të ish-krerëve të Ushtrisë Çlirimtare të Kosovës (UÇK), të cilët po gjykohen në Hagë.
Në një deklaratë të publikuar në rrjetet sociale, presidenti Begaj ka theksuar rëndësinë historike dhe kombëtare të UÇK-së, duke u shprehur se: “UÇK-ja është themeli i lirisë së Kosovës. Ajo është krenari e historisë sonë kombëtare. Askush nuk mund të zhbëjë këtë trashëgimi trimërie, sakrifice e heroizmi”.
Kreu i shtetit shqiptar u ka dhënë mbështetje të plotë pjesëmarrësve të protestës, e cila u organizua nga organizatat e dala nga lufta e UÇK-së.
Kjo protestë , ka mbledhur mijëra qytetarë nga Kosova, Shqipëria dhe trojet shqiptare, të cilët po kërkojnë drejtësi për ish-eprorët e UÇK-së që po përballen me akuza për krime lufte në Dhomat e Specializuara në Hagë.
