Prokuroria Themelore në Ferizaj bën të ditur se ka ngritur aktakuzë kundër të pandehurit me iniciale L.F., nga Ferizaj, për shkak të dyshimit të bazuar për kryerjen e veprës penale “Vrasja e rëndë”, sipas Kodit Penal të Republikës së Kosovës.
Sipas aktakuzës, dyshohet se më 23 janar 2025, në intervalin kohor prej orës 18:30 deri në 20:06 minuta, në fshatin Pleshinë e Ulët, në pjesën malore pranë rrugës “Rilindja” në fshatin Manastirc, komuna Ferizaj, i pandehuri L.F., me dashje dhe në mënyrë dinake, ka privuar nga jeta tani të ndjerin B.V.
“Më konkretisht, një ditë para ngjarjes, më 22 janar 2025, i pandehuri dhe i ndjeri kishin vendosur të shkonin së bashku në një villë në malet e fshatit Burrnik, komuna Ferizaj, ku kishin qëndruar edhe më parë. Rreth orës 16:00, pasi furnizoheshin me ushqim, i pandehuri, së bashku me një person të paidentifikuar, me një kamionetë ngjyrë të bardhë, shkojnë për të marrë viktimën nga shtëpia e tij”, thuhet në njoftim.
Pastaj, sipas njoftimit, me kamionetë, shkojnë në vendin e quajtur “Te Podi” dhe vazhdojnë në këmbë drejt villasë nëpër mal, ku qëndrojnë deri të nesërmen pasdite. Pas qëndrimit, vazhdojnë në këmbë nëpër malet e fshatit Pleshinë, duke u kthyer në drejtim të shtëpisë.
Në këtë rrugë kthimi, për shkaqe të panjohura, devijojnë drejt rrugës që shpie në fshatin Manastirc, po ashtu nëpër mal. Në afërsi të këtij fshati, për motive të panjohura, i pandehuri L.F. e privon nga jeta tani të ndjerin B.V., duke e qëlluar në kokë me armën që i ndjeri kishte me vete, një pushkë gjysmë automatike (kallashnikov). Plaga e shkaktuar shkakton vdekjen e viktimës, siç është konstatuar në raportin e Autopsisë.
Pas privimit nga jeta, i pandehuri e mbulon trupin e viktimës me dhe, drunjë dhe dushkë. Trupi i pajetë i të ndjerit gjendet më 5 shkurt 2025 nga disa qytetarë.
Me këtë, i pandehuri ka kryer veprën penale “Vrasja e rëndë”, sipas nenit 173, paragrafi 1, nënparagrafi 1.4 të Kodit Penal të Republikës së Kosovës.
Prokurori i çështjes, me rastin e ngritjes së aktakuzës, ka propozuar që pas mbajtjes së shqyrtimit gjyqësor dhe administrimit të provave, i pandehuri të shpallet fajtor për veprën penale për të cilën akuzohet dhe të dënohet sipas ligjit në fuqi.
