Kryeministri i Polonisë, Donald Tusk, ka thënë se askush nuk duhet të ushtrojë presion mbi udhëheqësin e Ukrainës që të dorëzojë territor për të siguruar një marrëveshje paqeje me Rusinë.
Tusk e bëri komentin në platformën X të dielën, duke iu referuar me sa duket raporteve se i dërguari i SHBA-së, Steve Witkoff, e kishte shtyrë Ukrainën që t’ia linte rajonin lindor të Donbasit Rusisë.
Gazeta Washington Post raportoi se Witkoff kishte ushtruar presion mbi një delegacion ukrainas gjatë një takimi në Shtëpinë e Bardhë të premten. Lajmi u pasua nga një intervistë me Presidentin Donald Trump, e transmetuar nga Fox Business të dielën, në të cilën kreu i shtetit amerikan tha se Vladimir Putin i Rusisë “do të pranojë diçka “, në çdo marrëveshje paqeje.
‘Presioni ndaj Rusisë’
Më vonë të dielën, Donald Tusk përdori mediat sociale për të theksuar se vendi ndaj të cilit duhet të ushtrohet presion është Rusia.
“Askush prej nesh nuk duhet të ushtrojë presion mbi Zelenskyn për çështjen e lëshimeve territoriale”, shkroi ai. “Të gjithë duhet të bëjnë presion mbi Rusinë që të ndërpresë agresionin. Lëshimet nuk kanë qenë kurrë rruga drejt paqes së drejtë dhe të qëndrueshme.”
Gazeta Washington Post raportoi se gjatë një telefonate të enjten e kaluar, udhëheqësi rus, Vladimir Putin, i tha Trump se Moska mund të jetë e gatshme të heqë dorë nga pjesët e pushtuara të rajoneve Zaporizhzhia dhe Kherson të Ukrainës, por vetëm në këmbim të rajoneve Donetsk dhe Luhansk, të cilat së bashku përbëjnë Donbasin.
Presidentët Trump dhe Putin pritet të takohen ballë për ballë në Budapest në të ardhmen e afërt për të diskutuar mundësinë e përfundimit të luftës.
