Në Dhomat e Specializuara të Kosovës në Hagë, me kërkesë të mbrojtjes së Jakup Krasniqit, janë pranuar disa dokumente si prova në rastin ku Krasniqi, së bashku me Hashim Thaçin, Kadri Veselin dhe Rexhep Selimin, akuzohen për krime lufte dhe krime kundër njerëzimit, derisa janë refuzuar një sërë provash tjera.
Në fakt, në vendimin e 16 tetorit 2025, i cili u bë publik, trupi gjykues ka refuzuar provat që lidhen me krime të kryera nga forcat serbe, duke i konsideruar si të parëndësishme për këtë çështje.
Mbrojtja kishte dorëzuar më 15 shtator 2025 kërkesën për pranimin e 39 dokumenteve, përfshirë raporte ndërkombëtare dhe materiale mediatike, me qëllim të kundërshtonte pretendimet e aktakuzës, të tregonte mungesën e kontrollit të Krasniqit mbi pjesëtarët e UÇK-së dhe paaftësinë e saj për të kontrolluar situata kaotike pas Marrëveshjes së Kumanovës, veçanërisht në Rahovec dhe Prizren. Dokumentet lidhnin gjithashtu situatën e sigurisë në Gjilan, ekzistencën e LDK-së dhe besueshmërinë e një dëshmitari.
Gjykata pranoi vetëm dokumentet që kanë lidhje të drejtpërdrejtë me akuzat kundër të akuzuarit, duke përjashtuar provat për krimet e forcave serbe.
Sipas trupit gjykues, mbrojtja s’ka vërtetuar ndonjë rast që lidhet me akuzat ose faktet në aktakuzë dhe as nuk ka lidhje me vlerën provuese për UÇK-në. Sipas tyre, mbrojtja e Krasniqit nuk e ka vërtetuar rëndësinë e provës 4.
Mbrojtja kishte paraqitur 39 dokumente, për të cilat kishte pasur kundërshtime nga Prokuroria. Dokumentet përmbajnë raporte ndërkombëtare dhe materiale mediatike, që sipas mbrojtjes, demonstrojnë mungesën e kontrollit të Krasniqit mbi veprimet e UÇK-së në disa zona.
Gjykata pranoi disa dokumente që ndihmojnë në vlerësimin e rrethanave dhe marrëdhënieve politike në periudhën e konfliktit, ndërsa disa të tjera u refuzuan për mungesë lidhjeje me akuzat.
Ndryshe, Specialja në këtë proces kishte pranuar prova nga Serbia. Procesi i mbrojtjes nisi më 15 shtator 2025 dhe dëshmitarët e parë përfshinë ish-zyrtarë ndërkombëtarë. Më 14 nëntor 2025 është caktuar përfundimi i paraqitjes së mbrojtjes, ndërsa parashtresat përfundimtare pritet të dorëzohen deri më 22 dhjetor 2025.
Aktakuza ndaj Thaçit, Veselit, Selimit dhe Krasniqit, e konfirmuar në tetor 2020, i ngarkon ata për krime lufte dhe krime kundër njerëzimit gjatë luftës në Kosovë. Të gjithë të akuzuarit janë deklaruar të pafajshëm.
Vendimi i plotë i Dhomave të Specializuara në Hagë:
