Anëtarë bandash dhe financues të errët që mbështesin tregtinë e neveritshme të kontrabandimit të njerëzve, përfshirë një rrjet falsifikimi pasaportash në Kosovë, janë ndaluar të udhëtojnë në Mbretërinë e Bashkuar dhe janë përjashtuar nga sistemi financiar britanik, si pjesë e aksionit të qeverisë kundër bandave që shfrytëzojnë një rrugë kyçe tranziti për migracionin e paligjshëm.
“Sanksionet e sotme kufizojnë aftësinë e tyre për të ndihmuar kontrabandën e njerëzve drejt Mbretërisë së Bashkuar dhe tregojnë vendosmërinë e qeverisë për të ekspozuar publikisht këdo që mbështet tregtinë e neveritshme të qenieve njerëzore, kudo që ndodhet në botë. Emërtimi dhe turpërimi i këtyre individëve, që përfitojnë nga anonimati, e bën më të vështirë për ta të operojnë”, thuhet në njoftim.
Ky njoftim vjen në kohën kur Kryeministri Keir Starmer është nikoqir i Samitit të Ballkanit Perëndimor në Londër, duke bashkuar udhëheqës të Ballkanit Perëndimor dhe të tjerë europianë për të diskutuar bashkëpunimin rajonal, migracionin e paligjshëm, sigurinë europiane dhe zhvillimin ekonomik.
“Ka një rrugë kriminale përmes Ballkanit Perëndimor që sjell migrantë të paligjshëm në Mbretërinë e Bashkuar, dhe jemi të vendosur ta mbyllim këtë rrugë duke bashkëpunuar me partnerët europianë. Përpjekjet tona të përbashkëta kanë reduktuar në gjysmë kalimet e paligjshme kufitare dhe kanë ulur me 95% numrin e shqiptarëve që vijnë me gomone. Përmes një Taskforcë të re të Përbashkët për Migracionin, dronëve britanikë dhe sanksioneve më të ashpra, po godasim bandat e kontrabandës në çdo hap të zinxhirit, për t’i nxjerrë jashtë loje dhe për të sjellë siguri për njerëzit që punojnë ndershëm”, ka theksuar kryeministri Keir Starmer.
Sekretarja e Jashtme, Yvette Cooper ka deklaruar se Ballkani Perëndimor është një rrugë tranziti kyçe për bandat e pamëshirshme të kontrabandës së njerëzve që tregtojnë me vuajtjet njerëzore.
“Regjimi ynë i sanksioneve, ndër më të avancuarit në botë, është një mjet vendimtar për të ndjekur bandat që veprojnë jashtë kufijve tanë dhe për të ekspozuar rrjetet e errëta që i mbështesin. Duke punuar me partnerët tanë në rajon, po marrim masa vendimtare për të siguruar kufijtë tanë dhe për të na bërë më të fortë në shtëpi”, ka theksuar ajo.
Sipas njoftimit, sanksionet e sotme janë hapi i fundit në një ofensivë të gjerë të qeverisë britanike dhe partnerëve kundër rrjeteve kriminale që shtyjnë migracionin e paligjshëm drejt MB-së. Këto veprime kanë bërë që numri i migrantëve të regjistruar nga Frontex që kalojnë përmes Ballkanit Perëndimor të bjerë nga mbi 140,000 në 2022 në vetëm rreth 21,000 në 2024.
Rrjeti i falsifikimit “Krasniqi”
Sipas njoftimit, një grup i krimit të organizuar me bazë në Kosovë, përgjegjës për prodhimin e dokumenteve false dhe shpërndarjen e tyre për bandat kriminale.
“Grupi krijonte pasaporta, ID dhe patenta të rreme për mbi 50 vende, përfshirë edhe Mbretërinë e Bashkuar. Laboratori i tyre i falsifikimit ishte i sofistikuar”, thuhet në njoftim.
Personat e përfshirë në listën e sanksioneve janë: Burim Krasniqi, i përshkruar si udhëheqës i “Rrjetit Krasniqi”; Arif Krasniqi, i identifikuar si ndërmjetës i grupit që siguronte klientë; Flamur Krasniqi, anëtar i grupit që kishte në posedim dokumente të falsifikuara; Valon Krasniqi, i përfshirë në prodhimin e dokumenteve false; Sami Duriqi, po ashtu i përfshirë në prodhimin e dokumenteve; Granit Avdyli, i angazhuar në prodhimin dhe reklamimin e shërbimeve të grupit; Nexhmie Selmani, e cila kishte ofruar objektin që është përdorur për falsifikim, si dhe pajisjet përkatëse; Endrit Emerllahu, i përfshirë në prodhimin e dokumenteve të falsifikuara; Shembim Emerllahu, anëtar i grupit që kishte në posedim dokumente false.
