Policia e Kosovës ka nënshkruar sot një marrëveshje bashkëpunimi me Universitetin e Prishtinës – Fakultetin e Inxhinierisë Elektrike dhe Kompjuterike, me qëllim të ngritjes dhe zhvillimit të mëtejmë të kapaciteteve dhe burimeve njerëzore në fushën e teknologjisë së informacionit dhe komunikimit.
Marrëveshja u nënshkrua nga drejtori i përgjithshëm i Policisë së Kosovës, kolonel Gazmend Hoxha, dhe dekani i Fakultetit të Inxhinierisë Elektrike dhe Kompjuterike, Prof. Dr. Isak Shabani.
Përmes kësaj marrëveshjeje, palët angazhohen për të forcuar bashkëpunimin reciprok, duke krijuar mundësi të reja për arsimim, trajnim profesional, shkëmbim përvojash akademike dhe praktike, si dhe për zhvillimin e projekteve të përbashkëta në fushën e sigurisë publike dhe arsimit të lartë.
Policia e Kosovës ka theksuar se mbetet e përkushtuar të vazhdojë me hapa konkretë në mbështetje të pjesëtarëve të saj, me synim rritjen e nivelit profesional dhe avancimin e vazhdueshëm të kapaciteteve të institucionit në përputhje me zhvillimet teknologjike bashkëkohore.
