Presidenti i SHBA-së, Donald Trump, ka thënë se sulmet e SHBA-së ndaj të ashtuquajturve narko-terroristë nuk kërkojnë deklaratë lufte dhe ka njoftuar se seria e fundit e bombardimeve të anijeve në Karaibe dhe Paqësor do të pasohet nga sulme në tokë. Ai theksoi se Kongresi do të informohet për operacionet, raportojnë agjencitë e huaja.
“Epo, nuk mendoj se domosdoshmërisht do të kërkojmë një deklaratë lufte”, u tha Trump gazetarëve në Shtëpinë e Bardhë.
“Mendoj se do t’i vrasim njerëzit që sjellin drogë në vendin tonë. Dakord? Do t’i vrasim”, tha Trump.
“Tani droga po vjen nga toka… e dini, toka do të jetë e radhës”, shtoi presidenti amerikan, duke përsëritur kërcënimet për të zgjeruar sulmet në territoret e vendeve që Uashingtoni i akuzon për lehtësimin e kontrabandës së narkotikëve në SHBA.
Që nga fillimi i shtatorit, ushtria amerikane ka kryer sulme ndaj të paktën nëntë anijeve në Karaibe dhe Oqeanin Paqësor, duke vrarë të paktën 37 persona. Uashingtoni e ka quajtur operacionin një luftë kundër “narko-terroristëve”, por nuk ka ofruar prova për të mbështetur akuzat.
Operacioni i intensifikuar i Uashingtonit kundër karteleve të drogës në Amerikën Latine përfshin vendosjen e anijeve luftarake amerikane, avionëve luftarakë F-35, një nëndetëse bërthamore dhe mijëra trupave në rajonin e Karaibeve.
Mprehja e retorikës
SHBA-të kanë përshkallëzuar gjithashtu retorikën e tyre kundër udhëheqësve të Venezuelës dhe Kolumbisë, duke akuzuar Presidentin Nicolás Maduro në Karakas dhe Gustavo Petro në Bogota për përfshirje në trafikun e drogës.
Venezuela ka akuzuar SHBA-në për nisjen e fushatës anti-kartel si pjesë e një komploti për të rrëzuar Presidentin Maduro. Ai tha të mërkurën se forcat e tij të armatosura kanë 5,000 raketa ruse tokë-ajër për t’iu kundërvënë çdo ndërhyrjeje ushtarake amerikane.
Agjencia e lajmeve AFP raportoi se të paktën një bombardues amerikan B-1B fluturoi mbi Detin e Karaibeve pranë brigjeve të Venezuelës të mërkurën, shfaqja e dytë e tillë e fuqisë ajrore amerikane brenda një jave. I pyetur për incidentin, Trump tha se “kjo është e rreme”, përpara se të shtonte se SHBA-të “nuk ishin të kënaqura me Venezuelën për shumë arsye”.
“I gjithë ligji ndërkombëtar është shkelur”
Trump tha gjithashtu se tani duhet t’i jetë e qartë të gjithë botës se kartelet e drogës janë “ISIS-i i Hemisferës Perëndimore”. Një krahasim i ngjashëm u bë nga Sekretari i Mbrojtjes i SHBA-së, Pete Hegseth, duke thënë: “Ashtu si Al Kaeda bëri luftë kundër atdheut tonë, këto kartele bëjnë luftë kundër kufirit tonë dhe popullit tonë”.
Presidentja meksikane Claudia Sheinbaum dhe presidenti kolumbian Petro dënuan sulmet e Uashingtonit ndaj anijeve në ujërat ndërkombëtare, duke i quajtur ato një shkelje të së drejtës ndërkombëtare.
“Padyshim, ne nuk jemi dakord. Ekzistojnë ligje ndërkombëtare që rregullojnë mënyrën se si duhet të kryhen operacionet… Ne ia bëmë të qartë këtë qeverisë së Shteteve të Bashkuara”, tha Sheinbaum të enjten.
Petro, i cili ka qenë në një debat publik verbal me Trumpin, tha se SHBA-të po “kryejnë ekzekutime jashtëgjyqësore” që “shkelin ligjin ndërkombëtar”.
“Amnesty International kundërshton bombardimet me raketa në Karaibe. I gjithë ligji ndërkombëtar është shkelur në Karaibe”, shkroi Petro në rrjetet sociale.
