I dërguari special i Kremlinit, Kirill Dmitriev, i tha CNN-së se Rusia, Ukraina dhe Shtetet e Bashkuara janë “pranë një zgjidhjeje diplomatike” që do t’i jepte fund luftës.
“Unë besoj se sfida e vërtetë është se si të vazhdohet dialogu, si të gjendet një zgjidhje paqësore për krizën, duke ofruar zgjidhje realiste në vend që të propozohen zgjidhje jorealiste”, tha Dmitriev.
Kur u pyet pse Presidenti rus Vladimir Putin refuzon të bjerë dakord për një armëpushim dhe një ngrirje të vijës së frontit në gjendjen e saj aktuale, Dmitriev u përgjigj se Rusia nuk dëshiron vetëm një armëpushim, por një zgjidhje përfundimtare të konfliktit. Ai shtoi se një armëpushim mund të shkelet gjithmonë ose të përdoret nga palët ndërluftuese për t’u riarmatosur.
“Ky është një hap i madh nga Presidenti [ukrainas] Volodymyr Zelenskyy për të pranuar tashmë se kjo është një vijë e frontit. Më parë, ai mbante qëndrimin se Rusia duhet të tërhiqet plotësisht [nga territoret e pushtuara të Ukrainës – RS] . Pra, në fakt, mendoj se jemi mjaft afër një zgjidhjeje diplomatike që mund të zhvillohet”, theksoi i dërguari i posaçëm i Kremlinit.
Sipas raportimeve të medias, negociatat midis Kirill Dmitriev dhe të dërguarit të posaçëm presidencial të SHBA-së, Steve Witkoff, janë planifikuar të zhvillohen të shtunën, më 25 tetor.
Kohët e fundit, administrata Trump vendosi sanksione kundër dy prej kompanive më të mëdha të naftës ruse, Rosneft dhe Lukoil. Këto janë sanksionet e para që Uashingtoni ka vendosur kundër Moskës që nga rikthimi i Trump në presidencën e SHBA-së.
