Forcat ukrainase dhe rusë vijojnë shkëmbimin e sulmeve përgjatë kufijve dhe në qytetet kryesore, duke shkaktuar dëme të mëdha infrastrukturore dhe viktima civile. Në Belgorod, një digë u godit dhe rrezikoi përmbytje, ndërsa në Dnipropetrovsk dhe Kiev sulmet me raketa dhe dronë shkaktuan humbje jete dhe plagosje të qytetarëve, duke vënë në provë sigurinë e banorëve dhe kapacitetin e shërbimeve emergjente.
Forcat ukrainase kanë goditur një digë në një rezervuar në rajonin e Belgorodit të Rusisë, duke shkaktuar dëme dhe duke rritur rrezikun e përmbytjeve, njoftoi guvernatori i rajonit, Vyacheslav Gladkov.
Në një deklaratë në Telegram, Gladkov paralajmëroi se goditjet e përsëritura mund të shkaktojnë përmbytje dhe u kërkoi banorëve të disa pjesëve të dy vendbanimeve kufitare, Shebekino dhe Bezlyudovka, të largohen nga shtëpitë e tyre dhe të gjejnë strehim të përkohshëm. Ky incident vjen në një kohë tensioni të lartë përgjatë kufirit rus-ukrainas.
Ndërkohë, situata në Ukrainë mbetet e tensionuar. Në rajonin e Dnipropetrovskit, një shpëtimtar humbi jetën dhe një tjetër u plagos gjatë një sulmi me raketa ruse në vendbanimin Petropavlovsk, në rrethin Sinelnyk. Një grua u vra gjithashtu në këtë rajon, ndërsa shtatë persona të tjerë u plagosën, sipas raportimeve të shërbimeve lokale të emergjencës.
Si pasojë e sulmit u dëmtuan dy automjete zjarrfikëse dhe shpëtimi, ndërtesa banimi dhe disa dyqane. Në komunitetin territorial të Pokrovskut, forcat ruse përdorën dronë vetëvrasës, duke goditur një ndërtesë banimi dhe shkaktuar zjarr, ndërsa granatimet në Nikopol shkaktuan zjarr në një garazh me një makinë. Të gjitha zjarret u shuan nga ekipet e emergjencës.
Në Kiev, një qytetar u vra gjatë një sulmi rus, ndërsa numri i të plagosurve arriti në dhjetë persona, sipas kreut të Administratës Ushtarake të Qytetit të Kievit, Timur Tkachenko, raporotjnë mediat ndërkombëtare.
Nga ana tjetër, Ministria Ruse e Mbrojtjes raportoi se sistemet e saj të mbrojtjes ajrore kanë interceptuar dhe shkatërruar 121 dronë ukrainas gjatë natës në më shumë se një duzinë rajonesh ruse, duke treguar intensitetin e përpjekjeve ajrore nga Ukraina dhe reagimin e Moskës ndaj tyre.
Situata mbetet e tensionuar në të gjithë frontin dhe për pasojë rrezikohen jo vetëm objektet infrastrukturore, por edhe jetët e civilëve në zonat kufitare dhe në qytetet e prekura nga sulmet.
