Mosvotimi i Qeverisë `Kurti 3` në Kuvend ka shkaktuar reagime të shumta nga analistë dhe opinionistë, të cilët vlerësojnë se kjo situatë ka pasoja negative për Kosovën. Ata theksojnë se refuzimi i deputetëve për të votuar qeverinë nxjerr në pah sfidat e bashkëpunimit ndërpartiak dhe rrezikun e krizave të reja politike.
Analistë dhe opinionistë kanë komentuar mosvotimin e Qeverisë ‘Kurti 3’, në RTK duke theksuar se kjo ka sjellë humbje për Kosovën dhe ka nxjerrë në pah sfidat e vazhdueshme të dialogut politik.
Politologu Milazim Koci tha se ka pasur elementë të tjerë përveç bashkëpunimit ndërpartiak që kanë kushtëzuar votimin e qeverisë, duke shtuar se është hera e parë që janë përjashtuar votat e Listës Serbe.
Ai theksoi se në fushatën parazgjedhore Kurti kërkonte 500 mijë vota për të formuar qeverinë vetëm, ndërsa LDK kërkonte fitore përndryshe do të mbetej në opozitë, dhe se praktikisht kishte mbetur vetëm opsioni i koalicionit LVV-PDK.
Sadik Zeqiri, analist, vlerësoi se kjo ishte e pritshme nga të gjithë përveç fansave të LVV-së dhe Kurti, i cili thoshte se kishte numrat, duke shtuar se nuk mund të formosh qeveri pa koalicion, sepse asnjë deputet nuk jep votën pa interes.
Gazetari Muhamet Hajrullahu tha se për mosvotimin e qeverisë humbja është për Kosovën, pasi LVV nuk i pati numrat, por as ish-opozita nuk i pati, dhe se sot ranë maskat e të dy palëve.
Politologu Dorajet Imari theksoi se qeveria nuk mund të formohet pa marrëveshje dhe se situata ka krijuar një klimë që e çon vendin drejt zgjedhjeve me plagë të vjetra, për shkak të qëndrimeve përçarëse dhe mosgatishmërisë për të komunikuar normalisht.
Ky episod politik sipas tyre tregon sfidat e vazhdueshme për bashkëpunim ndërpartiak dhe rëndësinë e dialogut për stabilitetin e vendit.
