Aktori Fatmir Spahiu i njohur edhe si `Bufi`, i propozuari për pozicionin e Ministrit të Kulturës dhe Turizmit, ka bërë të ditur se megjithëse Qeveria nuk u miratua në votim, ai mbetet i përkushtuar për të dhënë kontributin e tij në shërbim të vendit.
Në një postim në rrjetet sociale, Spahiu shprehet se kishte pranuar me bindje ftesën e kryeministrit në detyrë Albin Kurti për të marrë këtë detyrë, duke e konsideruar një mundësi për të shërbyer si profesionist, pa qenë pjesë e ndonjë partie politike.
“Pavarësisht që nuk u votua, e falënderoj zotin Kurti që tek unë ka parë një profesionist që do ta kryente mirë këtë detyrë. Si Buf, do të vazhdoj kontributin tim aty ku e shoh që e kam vendin, edhe atëherë kur nuk më kërkohet”, shkruan ai.
Spahiu thekson gjithashtu angazhimin e tij për promovimin e gjuhës së butë dhe respektit të ndërsjellë dhe shprehet se do të vazhdojë të punojë për të bërë Kosovën të parën në çdo fushë.
