Emisari i posaçëm i presidentit amerikan Donald Trump për Misione të Veçanta, Richard Grenell, ka kritikuar ashpër sistemin e drejtësisë në Evropë, duke e quajtur “brutal dhe arkaik”.
Përmes një postimi në platformën “X”, Grenell ka përmendur rastin e ish-presidentit të Kosovës, Hashim Thaçi, i cili po mbahet në paraburgim në Hagë që pesë vjet, duke theksuar se një situatë e tillë përbën shembullin më të qartë të dështimeve të sistemit evropian.
“Ka shumë arsye pse Evropa po dështon. Por një shembull është numri i madh i politikanëve evropianë që qëndrojnë rehatshëm të heshtur, ndërkohë që në Hagë mbahet në burg një kryetar shteti për pesë vjet pa gjyq. Dhe pastaj gjyqi zgjat edhe më shumë vite,” ka shkruar Grenell.
Ai ka shtuar se “ky është një sistem brutal e i drejtuar nga elitat”.
Grenell ka shkuar më tej duke thënë se “askush nuk duhet të marrë më këshilla gjyqësore nga ndonjë evropian”, ndërsa ka shprehur shpresën që Thaçi “t’i padisë të gjithë në Hagë në një gjykatë amerikane kur të lirohet, pasi janë paratë e taksapaguesve amerikanë”.
Liderët e UÇK-së, Hashim Thaçi, Kadri Veseli, Jakup Krasniqi e Rexhep Selimi po mbahen në paraburgim në Hagë që nga viti 2020, nën akuzat për krime lufte dhe krime kundër njerëzimit, të cilat i kanë mohuar që nga fillimi.
