Ministri belg i Mbrojtjes, Theo Francken, ka pohuar se NATO do ta rrafshojnë Moskën nëse Rusia do të sulmonte ndonjëherë Brukselin. Në një intervistë të gjatë, Francken preku një sërë çështjesh strategjike urgjente, duke përfshirë luftën në Ukrainë, mbrojtjen evropiane dhe parandalimin bërthamor.
I pyetur nëse kishte frikë se Presidenti rus Vladimir Putin mund të niste një sulm me raketa konvencionale në Bruksel, Francken nuk la vend për dyshime në përgjigjen e tij: “Jo, sepse atëherë ai do të godiste zemrën e NATO-s dhe pastaj ne do ta shkatërronim Moskën përtokë.” Ai shprehu mbështetje të fortë për lidershipin amerikan brenda NATO-s dhe përsëriti besimin e tij në Nenin 5 , klauzolën e mbrojtjes së ndërsjellë, e cila është themeli i Aleancës, shkruan The Brussels Times .
Kur u pyet nëse Presidenti i SHBA-së Donald Trump do ta respektonte Nenin 5, ai u përgjigj pozitivisht: “Sigurisht që do ta bënte. Ka shumë paragjykime në Evropë kundër qeverisë amerikane. Pse të mos e respektonte Nenin 5?”
“I Vogël i Gjelbër”
Francken është më i shqetësuar për përdorimin e luftës hibride nga Rusia sesa për kërcënimin e një sulmi konvencional. “Një raketë lundrimi në Bruksel? Është e qartë se kjo do të aktivizonte Nenin 5, pavarësisht se çfarë përkufizimi përdorni. Putini nuk do ta bëjë këtë”, tha ai.
“Unë jam më i prirur të marr në konsideratë skenarin e zonës gri: ‘burra të vegjël të gjelbër’ që nxisin pakicën rusishtfolëse në Estoni kundër ‘regjimit nazist’. Para se ta kuptoni, ata kanë aneksuar një pjesë të Estonisë”, shpjegoi ministri.
“Ideja e një ushtrie evropiane po shet mjegull”
Kur bëhet fjalë për idenë e një ushtrie të përbashkët evropiane, Francken kritikoi vendet më të mëdha evropiane për “maksimizimin e tregjeve të tyre” dhe vuri në pikëpyetje se si vendet, të cilat aktualisht nuk mund të bashkëpunojnë as në prokurimin e pajisjeve mbrojtëse, mund të integrojnë ushtritë e tyre kombëtare.
“Kushdo që beson në një ushtri evropiane po shet mjegull. Për fat të mirë, ne kemi NATO-n, e cila e ka provuar përsëri efektivitetin e saj me mbrojtjen ajrore në Poloni dhe Estoni”, tha ai.
Ushtria në rrugët e Brukselit
Francken mbështeti thirrjen e George-Louis Bouchez , udhëheqësit të Liberalëve Frankofonë (MR), që ushtria të vendoset në rrugët e kryeqytetit belg për të kontrolluar pikat e nxehta të trafikut të drogës.
“Nëse nuk merremi me luftën kundër drogës dhe pasigurisë, kanceri i Brukselit do të përhapet më tej. A kërkon kjo një ushtri në rrugë? Nëse po, atëherë do ta bëjmë”, tha ai.
