Presidentja Vjosa Osmani, nëpërmjet një video-postimi nga Riadi, ka konfirmuar njohjen e Pavarësisë së Kosovës nga Siria, duke e cilësuar këtë si një lajm të jashtëzakonshëm dhe si njohje të sakrificës ndërmjet dy popujve. Ajo paralajmëron se ditëve të ardhshme do të ketë edhe lajmë të tjera të mira.
Ajo njëkohësisht ka falënderuar Princin e Kurorës së Arabisë Saudite, Muhammed bin Salman Al Saud, për mbështetjen në këtë proces.
Osmani ka bërë të ditur se marrëveshja është arritur sot në Riad dhe ka falënderuar presidentin sirian, Ahmed al Sharaa, për vendimin e njohjes dhe për mbështetjen ndaj popullit të Kosovës.
“Me mbështetjen e Lartësisë së Tij Mbretërore, Princit të Kurorës së Arabisë Saudite, sot në Riad arritëm marrëveshjen nëpërmjet së cilës Republika Arabe e Sirisë njeh Republikën e Kosovës. Falënderoj presidentin Al Sharaa për vendimin për njohjen e Kosovës, si dhe për mbështetjen e tij ndaj popullit tonë,” ka deklaruar Osmani.
Sipas presidentes, ky është një lajm i jashtëzakonshëm, sepse bashkon dy shtete në krijimin e marrëdhënieve diplomatike dhe ndërshtetërore:
“Dy shtete që kanë vuajtur shumë nga luftërat e tmerrshme, dy shtete që kanë humbur shumë dhe kanë sakrifikuar shumë,” ka thënë Osmani.
Ajo ka shtuar se populli i Kosovës e njeh më mirë se kushdo sakrificën e popullit sirian për liri:
“E kemi parë se sa shumë kanë vuajtur të gjithë, përfshirë fëmijët, më të pafajshmit, sepse edhe Kosova ka pasur përjetime të ngjashme me shumë humbje gjatë luftës,” ka deklaruar Osmani, duke paralajmëruar se “do të ketë edhe lajme të tjera të mira në muajt që vijnë”.
Presidentja ka theksuar se Kosova do të vazhdojë punën pa ndalur për të forcuar pozitën e saj në arenën ndërkombëtare:
“Ne do të punojmë pa ndalë që Kosova të forcohet në arenën ndërkombëtare dhe ta ketë vendin që e meriton në mesin e Kombeve të Lira,” ka theksuar ajo.
Osmani ka vlerësuar se pjesëmarrja në samitin në Riad ka qenë shumë e rëndësishme, përtej takimeve bilaterale, përfshirë atë me Princin e Kurorës së Arabisë Saudite, si dhe me presidentë të shteteve të ndryshme.
“Kemi pasur mundësi të flasim në panelin e liderëve, të takojmë udhëheqësit e agjencive kryesore për investime publike dhe të diskutojmë për mundësitë e shumta që do t’i hapen Republikës sonë në bashkëpunim me Arabinë Saudite. Siç e përmenda, bashkëpunimi me aleatët gjithmonë sjell rezultate të mira, prandaj do të ketë edhe shumë lajme të mira në të ardhmen,” ka përfunduar Osmani.
