Kryetari i PDK-së, Memli Krasniqi pas takimit të liderëve të partive politike me presidenten Vjosa Osmani ka thënë se zgjedhjet e reja janë të pashmangshme, pasi nuk ka shumicë parlamentare.
“Takimi i ftuar nga presidentja për të diskutuar rreth mundësisë rreth një mandatari të ardhshëm përfundoi dhe ajo që është më e rëndësishmja nga ky takim u bë e qartë se askush nuk mundet ta krijojë shumicën e re parlamentare bazuar në legjislaturën aktuale. Së paku 52 deputetë të përfaqësuar nga katër kryetarë të partive shqiptare dhe disa nga partitë minoritare edhe në takim e kanë bërë të qartë se nuk janë pjesë e asnjë shumice, gjë që matematikisht e bën të pamundur arritjen e shumicës së re parlamentare dhe besoj se kjo do të duhej të ishte e mjaftueshme që sot edhe presidentja e vendit të vinte në një konkludim të tillë dhe pastaj të vepronte në drejtim të shpalljes së zgjedhjeve, të cilat tashmë deshëm apo s’deshëm janë të imponuar”, ka theksuar Krasniqi.
Ai ka thënë se për një situatë të tillë si PDK kanë paralajmëruar, por në këtë moment rruga përpara është vetëm shpallja e zgjedhjeve.
“Normalisht në këtë takim e bëmë të qartë qëndrimin tonë që përkundër përpjekjeve të mëhershme për të bërë një qeveri bashkë me partitë që ishin në opozitë në të kaluarën nuk e kemi arritur një gjë të tillë dhe rrjedhimisht imponohet shkuarja në zgjedhje të jashtëzakonshme. Por po ashtu kemi kërkuar që kjo të ndodhë sa më shpejt duke pasur parasysh se Kosova ka nevojë për një stabilitet, ka nevojë për institucione legjitime, për kuvend funksional dhe për një qeveri të re”, ka shtuar Krasniqi.
Ai ka thënë se çështjet që ndërlidhen me miratimin e buxhetit, me miratimin e disa marrëveshje ndërkombëtare, sidomos Planin e Rritjes për Ballkanin Perëndimor të BE-së, janë tema që vërtetë do të duhej të trajtohen shumë shpejt, por se sipas tij këto do të duhej të bëheshin nga një kuvend i ardhshëm dhe nga procedurat të cilat mund t’i zbatojë një qeveri legjitime, e që aktualisht, tha Krasniqi, një e tillë mungon.
“Shpresoj shumë që më së largu deri më 5 nëntor, edhe në kuptimin formal, zyrtar, kushtetues e legal nga ana e presidentes të merret vendimi i cili e përcakton dhe shpalljen e datës së zgjedhjeve. Sa i përket PDK-së ne konsiderojmë se e diela e parë që është brenda afatit kushtetues duhet të jetë edhe data e zgjedhjeve të ardhshme”, ka nënvizuar Krasniqi.
