Mbrojtja e mjedisit është një sfidë që prek gjithë botën e ndotja është e pranishme edhe në Ballkanin Perëndimor. Hedhja e mbeturinave në hapësira publike mbetet një problem që po e dëmton më së shumti ambientin.
Duke parë shtrirjen masive të kësaj dukurie, studentë të vendeve të ndryshme, morën pjesë në “Javën e gjelbër”, ku u diskutua projektligji për menaxhimin e integruar të mbeturinave, që u organizua nga GIZ-i gjerman, në bashkëpunim me Ministrinë e Mjedisit.
Bashkë me shumë kolegë të vendeve të ndryshme të Ballkanit Perëndimor, Denisa Muqa, studente nga Shqipëria, ishte pjesë e diskutimit mbi strategjinë e menaxhimit të integruar të mbeturinave.
“Kemi bërë gjëra shumë praktike, duke analizuar zonën, duke analizuar problemet, dhe mendoj se janë të arritshme”, tha Muqa.
Në dhjetor të vitit të kaluar, Qeveria e Kosovës ka aprovuar strategjinë për menaxhimin e integruar të mbeturinave. Zyrtarë të Ministrisë së Mjedisit nënvizuan se punohet në arritjen e e synimit.
“Targeti është konkretisht arritja e 55% riciklim deri në 2035, ndërsa deponi në më pak se 20% deri në vitin 2045, është tejet ambicioze, mirëpo, vlen me theksua se ambicia në këtë rast të jep edhe vullnet me punua”, tha Agim Mazreku, nga Ministria e Mjedisit, raporton RTKLive.
Në këtë fushe, Gjermania ka qenë bashkëpunëtore e vazhdueshme e Kosovës. Një projekt të tillë e ka përkrahur edhe ambasadori gjerman në Kosovë, Rainer Rudolph.
“Qëllimet tona në këtë drejtim janë të qarta, një mjedis më i shëndetshëm për banorët e Kosovës, nëpërmjet më shumë deponive, më shumë riciklimeve dhe shfrytëzim më të mirë të mirë të resurseve dhe kjo formë e bashkëpunimit, ka një dimension tjetër të rëndësishëm, jo vetëm të përmirësojë jetën e përditshme, por, edhe do ta bjerë Kosovën më afër BE-së”, tha Rainer Rudolpf, ambasador i Gjermanisë në Kosovë.
Komunat, bizneset e reja dhe shumë aktorë janë të përfshirë në këtë projekt për të pasur një Kosovë më të pastër, tha ambasadori Rudolph.
