Ish-kryeministri i Kosovës dhe deputeti i Lidhjes Demokratike të Kosovës, Avdullah Hoti, ka deklaruar se Projektligji për buxhetin e vitit 2026, i cili është miratuar nga qeveria në detyrë, i dorëzuar dje në Kuvend, është i kundërligjshëm. Ai ka theksuar se ky veprim përbën tejkalim të autorizimeve ligjore që ka qeveria në detyrë.
Në një postim në rrjetet sociale, Avdullah Hoti ka theksuar se në të kaluarën ka pasur raste kur qeveria në detyrë e ka përgatitur projektbuxhetin, por dorëzimi në Kuvend është bërë vetëm nga Qeveria e zgjedhur nga Kuvendi.
“Shkelja tjetër ligjore është se Projektligji i prezantuar në mbledhje të Qeverisë është bërë nga një deputet dhe u dorëzua në Kuvend nga një deputet tjetër, të cilët sipas aktgjykimit të Gjykatës Supreme janë duke i mbajtur kundërligjshëm pozitat e ministrit dhe kryeministrit”, ka shkruar Hoti.
Tutje, ai shprehu kritika nda të parës së shtetit, për neglizhencën e saj ndaj, siç u shpreh Hoti, shkelësve të Kushtetutës dhe ligjeve.
“Sigurisht se nuk pres reagimin e të parës së shtetit për të ndaluar funksionimin qartësisht jo kushtetues të Qeverisë në detyrë. Ajo ka qenë në vazhdimësi në linjë me shkelësit e Kushtetutës dhe ligjeve. As ajo dhe as Kurti nuk e kanë hallin e qytetarëve. Halli i tyre është si të ruajnë pushtetin, të cilin fatkeqësisht po e mbajnë duke prodhuar kriza në shkelje të ligjit e kushtetutës. Këta janë politikanë që mbijetojnë në politikë vetëm përmes krizave. Nuk dinë dhe nuk mund të mbijetojnë politikisht në situata të normalitetit politik, pasi situatat normale politike nuk i pranojnë mashtruesit”, ka shkruar Hoti.
