Kryetari i Partisë Demokratike të Kosovës, Memli Krasniqi, ka bërë homazhe pranë varreve të të dy heronjve të Kosovës, Afrim Zhitia e Fahri Fazliu. Ai tha se amaneti i tyre jeton në kujtesën tonë, në veprën tonë dhe në rrugën që ndjekim për një Kosovë të lirë, të pavarur e të zhvilluar.
Në një postim në ’Facebook’, kryetari Krasniqi, u shpreh se idealet e tyre janë po aq të freskëta, sa dita kur ranë.
”Ata ishin shembulli se fjala dhe pushka mund të jenë një dhe se dashuria për atdheun mund të jetë më e fortë se frika nga vdekja. Fryma e tyre u bë udhërrëfyese për brezin që më vonë u rreshtua në radhët e Ushtrisë Çlirimtare të Kosovës. Lavdi e përjetshme Afrim Zhitisë dhe Fahri Fazliut!”, ka shkruar Krasniqi.
