Një person ka humbur jetën pas një aksidenti trafiku që ka ndodhur sot rreth orës 17:35 në rrugën nacionale Pejë–Prishtinë, në fshatin Vragoli.
Sipas informatave fillestare, dyshohet se viktima, një këmbësor, është goditur nga një motoçikletë. Mjeku në vendin e ngjarjes ka konstatuar vdekjen e tij.
Lajmin për RTKlive e ka konfirmuar zëdhënësi i Policisë së Kosovës, Daut Hoxha.
“Rreth orës 17:35, në rrugën nacionale Pejë–Prishtinë, në Vragoli, është shkaktuar një aksident trafiku me fatalitet. Sipas informatave fillestare, dyshohet se një këmbësor është goditur nga një motor. Në vendin e ngjarjes, mjeku ka konstatuar vdekjen e një personi. Është njoftuar prokurori dhe mjekësia ligjore, ndërsa hetimet janë duke u kryer nga Policia për të sqaruar të gjitha rrethanat që kanë çuar deri te ky aksident tragjik”, tha Hoxha.
Policia apelon për kujdes në trafik, respektim të rregullave dhe përshtatje të shpejtësisë në rrugë, posaçërisht kur ka ndryshime atmosferike, reshje dhe dukshmëria është më e kufizuar.
