Policia e Kosovës ka bërë të ditur se më 1 nëntor 2025, ka pranuar një informacion se në zonën e Leposaviqit, një person me inicialet M. V., shtetas i Republikës së Kosovës dhe i nacionalitetit serb, dyshohet se është plagosur dhe rrëmbyer brenda territorit të Kosovës nga xhandarmeria serbe.
Sipas njoftimit të Policisë, vendi ku raportohet se ka ndodhur rasti gjendet brenda territorit të Republikës së Kosovës, në të ashtuquajturën “pika zero (0)”, në afërsi të zonës kufitare me Serbinë.
Policia e Kosovës ka njoftuar se menjëherë pas marrjes së informacionit ka bashkëpunuar me KFOR-in, si forcë përgjegjëse për zonën kufitare, dhe ka filluar veprimet hetimore për sqarimin e rastit.
“Drejtoria për Hetimin e Krimit të Organizuar dhe Krimeve të Rënda ka ndërmarrë veprimet e saj hetimore, duke intervistuar dëshmitarë të rastit. Sipas dëshmive, disa persona të maskuar kanë hyrë në territorin e Republikës së Kosovës, kanë plagosur dhe rrëmbyer viktimën, të cilën më pas e kanë dërguar në territorin e Serbisë, në drejtim të qytetit të Nishit”, thuhet në njoftim.
Tutje thuhet se në koordinim me Prokurorinë Themelore të Mitrovicës, Departamentin për Krime të Rënda, është iniciuar rasti.
Policia e Kosovës ka theksuar se mbetet e përkushtuar në përmbushjen e detyrave dhe përgjegjësive ligjore në mënyrë profesionale, në bashkëpunim me të gjitha institucionet e sigurisë.
