Policia e Kosovës ka njoftuar se gjatë 24 orëve të fundit janë raportuar disa raste të dhunës në familje në qytete të ndryshme të vendit. Në shumicën e rasteve, të dyshuarit janë arrestuar dhe ndaj tyre janë marrë masa ligjore me vendim të prokurorëve përkatës.
Në Lipjan, është arrestuar një person nën dyshimin se ka ushtruar dhunë psikike ndaj viktimës femër kosovare. Me vendim të prokurorit, i dyshuari është dërguar në mbajtje.
Policia ka njodtuar se edhe në Prishtinë, një grua ka raportuar se është sulmuar fizikisht nga një burrë. Viktima ka marrë trajtim mjekësor, ndërsa i dyshuari është arrestuar dhe dërguar në mbajtje me vendim të prokurorit.
Kurse në Obiliq, policia ka arrestuar dy persona burra, të cilët dyshohen se kanë ushtruar dhunë fizike ndaj një gruaje. Viktima ka pranuar trajtim mjekësor dhe është strehuar tek familja e saj, ndërsa pas intervistimit dhe konsultimit me prokurorin, të dyshuarit janë liruar në procedurë të rregullt.
Rast i dhunës në familje është regjistruar edhe në Rahovec, ku një person është arrestuar pasi ka ushtruar dhunë fizike ndaj viktimës gruaje. Viktima ka marrë trajtim mjekësor në QKMF-Rahovec dhe më pas, me vullnetin e saj, është larguar për tek familja e saj. I dyshuari është dërguar në mbajtje me vendim të prokurorit.
Në Gjakovë, policia ka arrestuar një të dyshuar kosovar, i cili pas një mosmarrëveshjeje kishte ushtruar dhunë ndaj viktimës femër. Viktima ka marrë trajtim mjekësor, është strehuar tek familja e saj dhe ka kërkuar urdhër mbrojtës, ndërsa i dyshuari është dërguar në mbajtje me vendim të prokurorit.
