Bashkëpunim në fushat akademike të trajnimeve, kërkimeve shkencore, zhvillimit të korrikulave, shkembim studentësh e profesorësh, parasheh marrëveshja që Universiteti iPrishtinës ka nënshkruar me një nga universitetet e Turqisë.
“Universiteti i Prishtinës nënshkroi javën e kaluar një memorandum bashkëpunimi me Universitetin Kirklareli të Turqisë, në kuadër të përpjekjeve të vazhdueshme për ndërkombëtarizim dhe rrjetëzim. Sipas memorandumit, të dy universitetet partnere janë pajtuar të rrisin bashkëpunimin në fushat akademike të trajnimeve, kërkimeve shkencore, zhvillimit institucional dhe të kurrikulave, sigurimit të cilësisë dhe shkëmbimit të informatave, thuhet në njoftim.
Në takimin që i parapriu nënshkrimit të marrëveshjes, drejtuesit e dy universiteteve, Arben Hajrullahu rektor i UP-së e Rengin Ak nga Universiteti Kirklareli i Turqisë, u zotuan për zbatimin me përkushtim të të gjitha pikave të memorandumit duke theksuar rëndësinë e madhe të bashkëpunimeve ndërkombëtare.
Universiteti Kirklareli ofron studime në fushat e ekonomisë, teknologjisë, inxhinierisë, turizmit, drejtësisë, mjekësisë, arkitekturës, dhe çdo vit pranon mbi 20 mijë studentë të rinj.
