ATSH/ Në Ditën Botërore të Gjuhës Rome, 5 nëntor, kujtohet një gjuhë e cila daton më shumë se një mijë vite më parë dhe që sot flitet në më shumë se 50 shtete të botës.
Kryeministri Edi Rama, ndau në rrjetet sociale, mesazhin e Ina Majkos, përfaqësues së parë të këtij komuniteti në Qeveri, që njëherësh mban edhe postin e zëvendësministres së Shëndetësisë dhe Mirëqenies Sociale.
Majko nënvizoi në mesazhin e saj se “Dita Ndërkombëtare e Gjuhës Rome është një ditë për të kujtuar se gjuha jonë nuk është thjesht fjalë. Është kujtesë. Është rrënjë. Është histori”.
Majko tha se “mbi 10 mijë njerëz në Shqipëri flasin romisht, një gjuhë që e ka mbajtur gjallë historinë tonë të pashkruar në libra, por të ruajtur në zemrat e njerëzve tanë”.
“Sot, unë ju ftoj ta nderojmë këtë histori mos ta lëmë më të heshtur. Nga 5 nëntori deri në 5 prill dërgo në oprerroma5@gmail.com historinë e familjes suaj. Një kujtim, një rrëfim, një copëz krenarie sepse çdo histori e vogël është pjesë e një historie të madhe”, përfundoi Majko.
UNESCO shpalli Ditën Botërore të Gjuhës Rome në vitin 2015 për të promovuar ruajtjen e gjuhës dhe kulturës rome, për të përmirësuar mirëqenien e popullit rom dhe për të njohur rëndësinë e të gjitha gjuhëve, diversiteti i të cilave është një burim force për të gjitha shoqëritë.
