NewCo Ferronikeli Complex L.L.C. ka njoftuar për ndryshime të rëndësishme organizative, duke paralajmëruar një plan ristrukturimi të fuqisë punëtore si pjesë e përpjekjeve për të siguruar stabilitet financiar dhe operativ në afat të gjatë.
Në njoftimin e kompanisë thuhet se vendimi vjen pas një periudhe mbi dyvjeçare të vështirë, që nga ndalimi i plotë i prodhimit në tetor të vitit 2023. Gjatë kësaj kohe, kompania thotë se ka mbuluar vetë të gjitha kostot operative, përfshirë pagat dhe mirëmbajtjen e kompleksit.
Ferronikeli thekson se rritja e çmimeve të energjisë elektrike në Evropë dhe luhatjet e tregjeve globale të metaleve kanë ndikuar drejtpërdrejt në rritjen e kostove të prodhimit dhe në përkeqësimin e qëndrueshmërisë financiare të kompanisë.
“Pas një vlerësimi të kujdesshëm, është konstatuar se mbajtja e fuqisë punëtore aktuale pa prodhim është bërë e pamundur. Prandaj, kompania do të procedojë me largimin kolektiv në përputhje të plotë me Ligjin e Punës,” thuhet në njoftim.
Kompania garanton se të gjithë punonjësit e prekur do të marrin të gjitha të drejtat ligjore deri në datën e ndërprerjes, ndërsa procesi i njoftimeve individuale do të zhvillohet sipas procedurave ligjore.
NewCo Ferronikeli thekson se mbetet e përkushtuar ndaj Kosovës dhe punonjësve të saj, duke u zotuar se, sapo të përmirësohen kushtet e tregut, punonjësit e prekur do të kenë prioritet për ripunësim. Një numër i kufizuar i personelit thelbësor do të vazhdojë të punojë për të siguruar integritetin e kompanisë dhe për të përmbushur detyrimet ligjore.
“Pavarësisht sfidave aktuale, NewCo Ferronikeli mbetet e bindur në potencialin afatgjatë të prodhimit të nikelit dhe është e vendosur të rikthejë operacionet e plota sapo të kthehet stabiliteti i tregut”, përfundon njoftimi
