Në tubimin elektoral të Aleancës për Ardhmërinë e Kosovës në Klinë, kryetari i kësaj partie, Ramush Haradinaj, kërkoi mbështetjen e qytetarëve për Zenun Elezajn, kandidatin e këtij subjekti politik për kryetar të komunës.
Haradinaj u shpreh i bindur se AAK-ja gëzon mbështetjen e palëkundur të qytetarëve të Klinës për Zenun Elezajn, duke theksuar se ai është një njeri me vlera të veçanta dhe me projekte që përmirësojnë jetën e qytetarëve.
“Nuk ka qenë e lehtë për AAK-në, por qytetarët e Klinës e kanë kuptuar se nuk është fjala vetëm për parti, por për njerëzit e vendit të tyre, pa dallim feje e përkatësie. E shihni se sa mirë ka ecur puna – Komunës së Klinës i prinë një profesionist, një njeri që ka ngritur nivelin e qeverisjes dhe që është vlerësuar lart për punën e tij. Ju jeni me fat që keni një figurë si Zenun Elezaj, sepse Klina sot është ndër komunat më të zhvilluara në vend”, tha Haradinaj
Ndërsa, kandidati për kryetar të Klinës nga radhët e AAK-së, Zenun Elezaj, tha se Klina është bastioni i AAK-së dhe se përkrahja e qytetarëve, është dëshmi e rezultateve dhe punës së bërë gjatë mandatit të kaluar.
Nga ana e tij, Elezaj premtoi ndërtimin e impianteve për trajtimin e ujërave të zeza, përfundimin e rrugës transit, investime në fabrikën e ujit, qendrën rinore dhe qendrën e mjekësisë familjare. Përveç këtyre, ai tha se ndër projektet tjera ka edhe rregullimin e lumenjve, mbështetje financiare për bujqit dhe fëmijët e sapolindur, e gjithashtu duke garantuar qeverisje të ndershme e zhvillim të mëtejshëm të Klinës.
“Gara jonë nuk ka përfunduar ende. Tani jemi në raundin e dytë të një gare që do ta përcaktojë drejtimin e Klinës për katër vitet e ardhshme. Për tetë vite kemi qeverisur me duar të pastra, me transparencë dhe përkushtim ndaj qytetarëve. Në mandatin e ardhshëm do të realizojmë katër impiante të reja për ujërat e zeza, do të investojmë në fabrikën e ujit, dhe do të përfundojmë rrugën transite të Klinës, qendrën rinore dhe 20 parqe të reja publike. Gjithashtu, kemi nisur ndërtimin e qendrës së re të mjekësisë familjare, rregullimin e shtretërve të lumenjve, si dhe subvencione në vlerë prej 2.1 milionë eurosh për bujqit dhe 500 euro për çdo fëmijë të sapolindur. Klina ka avancuar ndjeshëm – dhe së bashku do ta çojmë edhe më lart. Më 9 nëntor, dilni dhe votoni për zhvillimin e Klinës sonë”, tha Elezaj
