Kryetari i PDK-së, Memli Krasniqi ka thënë se pesë vjet më parë udhëheqësit kryesor të luftës çlirimtare shkuan në Hagë me kokën lart, pa u fshehur, ankuar e pa kërkuar privilegje. Krasniqi teksa thekson padrejtësinë që po bëhet në procesin ndaj tyre, thekson se hsitoria nuk mund të rishkruhet në asnjë gjykatë, dhe se ajo është e shkruar me gjak e sakrificë.
“Pesë vjet më parë u ndaluan padrejtësisht katër nga udhëheqësit kryesorë të luftës çlirimtare: Hashim Thaçi, Kadri Veseli, Jakup Krasniqi dhe Rexhep Selimi. Pesë vjet më vonë, procesi po vazhdon të zvarritet, padrejtësia po rritet, ndërsa e vërteta që ne e dimë dhe e njohim ende s’e ka marrë verdiktin që e meriton.
Ata shkuan në Hagë me kokën lart, pa u fshehur, pa u ankuar, pa kërkuar privilegje. Shkuan si burrështetas, si ushtarë të lirisë, me besim në drejtësi, me dinjitetin që ua dha historia dhe me dashurinë që ia dhanë Kosovës.
Kjo histori e vendit tonë nuk mund të rishkruhet në asnjë gjykatë. Ajo është shkruar me gjak, me sakrificë dhe me qëndresën e një populli që nuk u përkul kurrë,” ka shkruar Krasniqi.
Ai ka thënë se Kosova nuk kërkon asgjë më shumë sesa atë që u takon bijve të saj – drejtësi, të vërtetën dhe lirinë për çlirimtarët.
