Kryetari i Partisë Demokratike të Kosovës, Memli Krasniqi, në pesë vjetorin e ndalimit të ish-krerëve të UÇK-së nga Dhomat e Specializuara në Hagë, në pesëvjetorin e shkuarjes në Hagë të ish-Presidentit Hashim Thaçi, ish-kryetarit Kadri Veseli dhe Jakup Krasniqit, vizitoi familjet e tyre për të shprehur solidaritetin të plotë.
“Në pesëvjetorin e shkuarjes në Hagë të Presidentit Hashim Thaçi, Kryetarit Kadri Veseli dhe Jakup Krasniqit, vizituam familjet e tyre për të shprehur solidaritetin tonë të plotë me mallin dhe vuajtjen e tyre për më të dashurit që u mungojnë prej një kohe të gjatë”, tha ai.
Sipas tij, familjet Thaçi, Veseli, Krasniqi e Selimi, megjithatë, kanë shumë më tepër arsye për të qenë krenare për bijtë e tyre, sepse ata u takojnë të gjithëve, e mbi të gjitha, Kosovës.
“Ata ishin bashkë në luftë, bashkë në ndërtimin e shtetit, dhe sot janë bashkë në përballjen me padrejtësinë, me të njëjtin dinjitet që i ka përcjellë gjithmonë. Urojmë që ky proces, i dalë prej binarëve të drejtësisë dhe arsyes, të përfundojë sa më shpejt me verdiktin që e presim të gjithë, lirinë e çlirimtarëve, që ata të kthehen te familjet dhe te populli i tyre. Kosova ju pret”, shkroi Krasniqi në ‘Facebook’.
