Kryetari i Partisë Demokratike të Kosovës, Memli Krasniqi, ka kritikuar qeverinë për siç thotë ai “mënyrën se si po përpiqet të ndikojë tek studentët pak ditë para zgjedhjeve”.
Në një postim në Facebook, Krasniqi ka thënë se kryeministri i ka harruar studentët për pesë vite dhe tani duket sikur po kujtohet për ta vetëm përmes një mesazhi propagandistik dhe 100 eurove në llogari.
“Një kryeministër mashtrues që i ka harruar studentët për pesë vite, tani kinse po kujtohet për ta tri ditë para zgjedhjeve – jo për t’i ndihmuar, por duke dashur t’i mashtroj me nga një mesazh propagandistik dhe 100 euro në llogari”, ka shkruar Krasniqi.
Ai ka potencuar se se studentët dhe familjet e tyre nuk do të ndikohen nga përpjekjet elektorale të qeverisë.
“Studentët nuk mashtrohen kaq lehtë. Ata e dinë se kjo nuk është ndihmë, por hipokrizi me llogari elektorale. Prandaj, ata, bashkë me familjet e tyre që i edukojnë me sakrificë, më 9 nëntor do ta kthejnë përgjigjen e tyre meritore – me dinjitet, me votë dhe me vetëdije!”, ka shkruar kreu i PDK-së.
