Prokuroria Themelore në Gjakovë ka njoftuar opinionin publik se është arrestuar personi i dyshuar A.I., i cili ishte në kërkim për vrasjen e dyfishtë që ndodhi në fshatin Golluboc, Komuna e Malishevës.
Sipas njoftimit, arrestimi i të dyshuarit është bërë pas një periudhe arratie, ndërsa Policia e Kosovës, në bashkëpunim të plotë me Prokurorin e Shtetit, po ndërmerr të gjitha veprimet e nevojshme hetimore lidhur me rastin.
Brenda afateve të parashikuara me ligj, Prokuroria do të paraqesë në Gjykatën kompetente kërkesën për caktimin e masës së paraburgimit ndaj të dyshuarit, thuhet në njoftim.
Kujtojmë, se një ditë më parë, më 6 nëntor 2025, në fshatin Golluboc të Komunës së Malishevës ishte raportuar një vrasje e dyfishtë, ku viktima mbetën dy vëllezër. Sipas të dhënave, ata u qëlluan me armë zjarri nga dhëndri i tyre i identifikuar si A.I., i cili pas ngjarjes ishte larguar nga vendi i krimit.
Prokuroria Themelore në Gjakovë kishte bërë të ditur se rasti po hetohej si “vrasje e rëndë”, ndërsa në bashkëpunim me Policinë e Kosovës ishin ndërmarrë veprime intensive për lokalizimin e të dyshuarit.
Kryeprokurori i Gjakovës, Enis Gashi, kishte konfirmuar se viktimat dhe i dyshuari kishin lidhje familjare, ndërsa motivi i ngjarjes ende nuk është përcaktuar.
