Sekretarja e Përgjithshme e Partisë Demokratike të Kosovës (PDK), Vlora Çitaku, u ka bërë thirrje qytetarëve të komunave që sot janë në balotazh që të dalin dhe ta shfrytëzojnë të drejtën e tyre për të votuar.
Në një konferencë për media, Çitaku theksoi se këto zgjedhje nuk janë vetëm për një kandidat apo një parti të caktuar, por për drejtimin e komunave dhe për cilësinë e jetës së qytetarëve në katër vitet e ardhshme.
“Kandidatët tanë janë më afër qytetarëve, më të përgjegjshëm dhe më të përkushtuar për t’u shërbyer me korrektësi dhe përulësi. Çdo votë është një vendim për të ardhmen, dhe sot është dita që përcakton katër vitet e ardhshme. Le të mbajmë këtë ditë demokratike deri në fund të saj me qetësi, korrektësi dhe respekt ndaj secilit votues”, tha Çitaku.
Ajo shtoi se raportet nga terreni tregojnë një rritje të pjesëmarrjes së qytetarëve në votime, ndërsa pritet që dalja të shtohet edhe më shumë në orët e fundit të procesit, siç ndodh zakonisht.
“Kanë kaluar tashmë nëntë orë nga hapja e vendvotimeve, dhe procesi zgjedhor po zhvillohet përgjithësisht qetë dhe pa incidente serioze. Mirënjohje për punën e komisionerëve, vëzhguesve dhe gjithë qytetarëve që po kontribuojnë për një ditë zgjedhore të rregullt, transparente dhe demokratike”, tha ajo.
Çitaku kujtoi se PDK garon sot në gjashtë komuna, Prizren, Mitrovicë, Vushtrri, Kaçanik, Klinë dhe Dragash, ku, sipas saj, qytetarët po e shprehin vullnetin për punë, zhvillim dhe përgjegjësi.
Në fund, ajo u bëri thirrje të gjithë akterëve politikë dhe personave me përgjegjësi publike që të tregojnë maturi dhe përgjegjësi gjatë ditës, duke mos kontribuar në tensionimin e situatave në asnjë komunë të vendit.
“U bëj thirrje të gjithëve që t’u mundësojnë qytetarëve të votojnë lirshëm, qetë dhe në mënyrë plotësisht demokratike”, përfundoi Çitaku.
