Presidentja e Republikës së Kosovës, Vjosa Osmani, ka votuar në qendrën e votimit në Fakultetin Teknik në Prishtinë për zgjedhjet lokale që po mbahen sot në Kosovë. Ajo ka deklaruar se Kosova ka demokracinë më të lartë elektorale në rajon.
Pas hedhjes së votës, para mediave, Osmani ka thënë se qytetarët sot vendosin për një të ardhme më të mirë, jo vetëm për fëmijët, por edhe për mundësitë që janë përpara. E para e vendit gjithashtu ka theksuar se zgjedhjet lokale dhe ato nacionale janë procese të ndara, dhe do të shihet në ditët në vijim se çfarë do të ndodhë.
“Është ditë po aq e rëndësishme sa rundi i parë i zgjedhjeve. Sot përfundimisht vendosin jo vetëm se kush do të qeverisë, por vendosin edhe për një të ardhme më të mirë për fëmijët tanë. Rrjedhimisht shpresoj që secili prej qytetarëve me të drejtë vote do ta shfrytëzojë këtë të drejtë dhe të dalë të votojë. Kosova ka demokracinë më të fortë elektorale në rajon dhe kjo është pikërisht për shkak të pjesëmarrjes së qytetarëve tanë në votime dhe se organizojmë zgjedhje të lira e demokratike”, deklaroi Osmani
Ajo është pyetur për ndonjë ndikim të mundshem të rezultatit të zgjedhjeve lokale në ato nacionale. “Këto janë procese të ndara, natyrisht që zgjedhjet komunale nuk kanë ndikim në proceset në nivel nacional në të cilin po kalojmë”, tha Osmani.
