Koordinatorja nacionale për zgjedhje në sistemin prokurorial, Laura Pula, ka bërë të ditur se që nga ora 07:00 e mëngjesit, kur ka filluar procesi i votimit në 18 komuna që shkojnë në balotazh, janë angazhuar 80 prokurorë dhe staf mbështetës në terren për të siguruar mbarëvajtjen e procesit zgjedhor.
Pula tha për RTK se deri më tani janë evidentuar disa informacione për parregullsi të ndryshme, ndërsa në Fushë Kosovë është hapur një rast penal për dhënie dhe marrje ryshfeti në lidhje me votimin.
Sipas saj, dy persona janë arrestuar pasi kishin premtuar pagesë për ata që fotografonin votën dhe ia dërgonin porositësit. “Në këtë rast janë kapur dhënësi dhe marrësi i ryshfetit, dhe telefoni i përdorur është sekuestruar si provë”, deklaroi Pula.
Ajo shtoi se rasti është trajtuar menjëherë falë bashkëpunimit të institucioneve përmes memorandumit të përbashkët ndërmjet Prokurorisë, Policisë së Kosovës, KQZ-së dhe PZAP-it, duke theksuar se çdo raportim trajtohet në moment dhe pason reagimi i menjëhershëm i policisë dhe prokurorit të shtetit.
Pula po ashtu njoftoi se ka pasur disa moskuptime lidhur me votimin me asistencë. Ajo tha se KQZ ka dal me deklarim të mirëfilltë dhe me sqarime se si duhet të votohet me asistencë . “Në rastet kur qytetarët nuk mund të votojnë vetë, ndihma u ofrohet nga komisionerët brenda vendvotimit”.Këtu ka pasur disa moskuptime, por ato janë eleminur, shtoi ajo.
