Një ditë pas balotazhit, kryetari i Partisë Demokratike të Kosovës, Memli Krasniqi ka thënë se PDK-ja u konfirmua si partia më e votuar në Kosovë.
“Me 187,526 vota, PDK u konfirmua si partia më e votuar në Kosovë. Me 206 asamblistë të zgjedhur, mbetëm forca me përfaqësimin më të gjerë lokal në vend. Dhe me gjashtë komuna të fituara, Ferizaj, Prizren, Skenderaj, Vushtrri, Kaçanik dhe Han i Elezit, PDK dëshmoi se suksesi ndërtohet mbi punë me rezultate dhe përfaqësim me dinjitet. Në katër prej ballafaqimeve direkte në balotazh me pushtetin qendror, ne i fituam tri prej tyre”, ka shkruar Krasniqi.
Kreu i PDK-së tha se disa gara kanë qenë më të vështira, madje, siç ka thënë, edhe të pabarabarta.
“Por për ne, çdo përpjekje e ndershme është fitore në vetvete, sepse PDK nuk e mat suksesin vetëm me numra, por me qëndresën, qetësinë dhe përgjegjësinë me të cilat e përfaqëson qytetarin në çdo rrethanë”, ka shkruar ai.
Ai ka falënderuar të gjithë ata që i hynë garës për kryetar komunash nën logon e PDK-së, por e veçoi njërin prej tyre.
“Me këtë rast, dua të shpreh mirënjohjen dhe respektin e veçantë për mikun tim, yllin e kësaj fushate, Arian Tahirin në Mitrovicë, i cili, i vetëm përballë tërë aparatit shtetëror, bëri një garë të fortë, dinjitoze dhe të ngushtë deri në fund”, ka shkruar kryetari i PDK-së.
Ai ka falënderuar aktivistët e mbështetësit e PDK-së, dhe qytetarët që tha se me pjesëmarrjen dhe kulturën e tyre demokratike, i bënë zgjedhjet një shembull për rajonin dhe më gjerë.
“Partia Demokratike e Kosovës sot qëndron më e bashkuar, më e pjekur dhe më e përgatitur për sfidat që na presin. Në ditët në vijim, do të përqendrohemi në forcimin e bashkëpunimit me qytetarët, në përmirësimin e qeverisjes lokale dhe në konsolidimin e strukturave tona anembanë vendit. Sepse ky rezultat nuk është fundi, por fillimi i një kapitulli të ri, kapitulli i bashkimit, rigrupimit dhe përgatitjes për fitoret e ardhshme”, ka shkruar kryetari i PDK-së, Memli Krasniqi.
