PESËDHJETË vende të Amerikës Latine dhe Bashkimi Evropian shprehën dje në Kolumbi kundërshtimin e tyre ndaj “përdorimit të forcës” në kundërshtim me të drejtën ndërkombëtare, në kontekstin e tensioneve me Shtetet e Bashkuara për shkak të sulmeve amerikane ndaj anijeve në Detin e Karaibeve dhe Oqeanin Paqësor.
Kjo deklaratë i dha fund ditës së parë të samitit të Komunitetit të Shteteve të Amerikës Latine dhe Karaibeve (CELAC) dhe Bashkimit Evropian, i cili u shënua nga kritika të fshehta ndaj Uashingtonit dhe referenca ndaj konflikteve ndërkombëtare.
“Ne përsërisim se kundërshtojmë përdorimin ose kërcënimin e përdorimit të forcës dhe çdo veprim që do të ishte në kundërshtim me të drejtën ndërkombëtare dhe Kartën e Kombeve të Bashkuara”, thuhet në tekstin e nënshkruar nga 58 nga 60 vendet të dielën, ndërsa Venezuela dhe Nikaragua abstenuan.
“Ne shqyrtuam rëndësinë e sigurisë detare dhe stabilitetit rajonal të Karaibeve”, shtoi dokumenti, por nuk përmendi drejtpërdrejt sulmet e SHBA-së ndaj anijeve të dyshuara nga Uashingtoni se transportonin drogë, të cilat kanë vrarë 70 persona deri më tani.
Asnjë përmendje e Trumpit
Deklarata nuk e përmend Trumpin “thjesht sepse nuk arritëm t’i bindim të gjitha shtetet ta mbështesin atë”, shpjegoi nënkryetarja e Komisionit Evropian, Kaja Kallas.
Presidenti amerikan akuzon homologun e tij venezuelian, Nicolas Maduro, se është anëtar i një karteli droge dhe e quajti presidentin kolumbian Gustavo Petro një “lord droge”.
“Kërcënimi i përdorimit të forcës ushtarake është përsëri pjesë e jetës së përditshme në Amerikën Latine dhe Karaibe. Manovrat dhe retorika e vjetër po riciklohen për të justifikuar ndërhyrjet e paligjshme”, tha Presidenti brazilian Luiz Inácio Lula da Silva, një aleat i Gustavo Petros.
Megjithatë, Kallas, me të mbërritur në samit, pohoi se “forca mund të përdoret vetëm për dy arsye: ose për mbrojtje legjitime ose në zbatim të një rezolute të Këshillit të Sigurimit të OKB-së”.
Dënimi i luftës në Ukrainë
Deklarata e përbashkët dënon gjithashtu “luftën që po zhvillohet kundër Ukrainës, e cila vazhdon të shkaktojë vuajtje të mëdha njerëzore”.
Sipas Kaja Kallas, Venezuela dhe Nikaragua nuk e nënshkruan deklaratën për shkak të asaj pjese.
Nga 33 vendet anëtare të CELAC dhe 27 anëtarët e BE-së, vetëm nëntë krerë shtetesh po marrin pjesë në samit, i cili përfundon të hënën.
