/ATSH/ Kryetari i Partisë Demokratike, Sali Berisha, tha sot se ditën e henë opozita do të nisë platformën parlamentare para Kryeministrisë, ku do të flasin deputetët dhe qytetarë.
“Dita e hënë do të jetë dita e fillimit të parlamentit para Kryeministrisë, të qytetarëve dhe parlamentarëve”, tha Berisha,
Berisha theksoi se “PD ndërmerr tani një fillim të ri, një analizë të plotë të gjendjes në vend, të situatës, të zgjedhjeve dhe ecën në bindjen më të thellë ndaj kësaj narkodiktature ka vetëm një rrugë, protestë dhe vetëm protestë”.
Berisha tha se “deputetët do të jenë edhe në platformë, edhe në komisione, edhe në parlament, do jenë edhe në takime me qytetarët”.
“Unë nuk mund të them se të gjithë deputetët do jenë aty, në rast se deputetët kanë takime të caktuara me elektoratin, përparësi absolute do kenë takimet me elektoratin dhe nuk mund t’u devijojnë. Pra, ne tani jemi hedhur në një betejë të gjithanshme me regjimin”, tha Berisha.
Gjatë fjalës së tij Berisha u ndal edhe tek vrasja e një dite më parë pranë aeroportit të Rinasit, ku mbeti i vdekur Gilmando Dani dhe u plagos rëndë punonjësi i Agjencisë së Mbikëqyrjes Policore, Muçi Shaljani (Sheqeri).
Berisha tha se ata u vranë në një vend të sigurt e se nga policia nuk u bë asnjë përpjekje për arrestimin e autorëve.
“Vendi i ekzekutimit publik të tyre, në protokollet e sigurisë publike është vendi më i ruajtur se çdo vend tjetër. Pra, atentatorët apo vrasësit, pasi shkrehën breshëri të shumta mbi makinën që e prisnin të sigurtë, dhe i kishin zënë pritë pikërisht aty që nuk mund të zije pritë kurrë pa lejen e shtetit, pas ekzekutimit u larguan të qetë dhe përshkuan pa asnjë lloj telashi apo andralle të gjithë rrugën Rinas-Fushë-Krujë, të gjithë rrugën Fushë-Krujë pothuajse në Krujë. Fshati Halil është pranë Krujës, ngjitur me kalanë e Zgërdheshit. Dhe ata shkuan në Zgërdhesh dhe asnjë lloj përpjekje nuk u bë nga narkopolicia për të ndaluar vrasësit”, tha Berisha.
