Ish-këshilltari politik i gjeneralit Clark, gjatë dëshmisë në Hagë, u pyet për takimin që ka thënë se e ka shoqëruar shefin e tij me Hashim Thaçin. Atij iu shfaq edhe një dokument si provë nga mbrojtja.
Në dokument si pjesë e delegacionit shiheshin emrat e Hashim Thaçit, Ramë Bujës, Jakup Krasniqit, Xhavit Halitit, Azem Sylës, Blerim Shalës, Edita Tahirit, Mehmet Hajrizit, Fehmi Aganit e Gjergj Dedajt.
“Personat që i kam takuar personalisht kanë qenë Thaçi dhe Krasniqi, emrat tjerë janë thjesht të dëgjuar dhe jo të takuar”, tha ai gjatë dëshmisë së tij.
“ Ju thoni se qëllimi i takimit ishte që pjesërisht Clark dëshironte të kuptonte më mirë synimet politike të UÇK-së dhe kapacitetet ushtarake në rast se do të urdhërohej dhe do të kryhej një operacion ushtarak. Pse ishte e rëndësishme të kuptoheshin synimet politike të UÇK-së në këtë kohë?”, pyeti mbrojtja dëshmitarin.
Ai tha se çdo komandant ushtarak që mendon për misionin është e rëndësishme për të ditur cili është mjedisi në terren.
“Nuk mund të kryesh ti operacionin ushtarak pa e ditur se kush do të jenë aktorët kryesor, çfarë aftësish kanë, çfarë synimesh, çfarë objektivash kanë ata. Në çfarë mënyrash ata mund të kërcënohen nëse mund të ndihmojnë misionin që mund të jenë në përgatitje e sipër”.
“Çfarë përfundimi u nxor pas këtij takimi, sa i përket synimeve politike të UÇK-së”, pyeti tutje Tavakoli?.
“Mendoj se në atë pikë Clark po mendonte se deri në çfarë mase ata mund të bëheshin bashkëpunues të misionit”.
“Për kënd keni fjalën?”, pyeti Tavakoli.
“E kam fjalën për UÇK-në ose mund të bëheshin në thonjëza armiq të misionit dhe në këtë rast do duhej që të merrnim veprime ndaj tyre. Pra duhet të dinim nëse do të kishim të bënim me partner ose armiq”, tha ai.
Kur u pyet tutje se çfarë përfundimi nxorën, dëshmitari i mbrojtjes tha se në atë pikë UÇK-ja përbënte potencial për bashkëpunim, por ishte herët për ta thënë këtë me saktësi.
“Pse mendon se kishin potencial që të ishin bashkëpunëtorë?”, pyeti tutje Tavakoli.
“Sepse ishin shumë të gatshëm të gjenin mënyra që të merrnin mbështetjen e NATO-s për fushatën ajrore për t’i rezistuar shtypjes serbe”, tha dëshmitari Durkee.
“Si e demonstruan këtë gatishmëri ata?”, ishte pyetja tjetër e mbrojtjes.
“Sepse ata vazhdonin të pyesnin nëse mund të bombardonim serbët, sepse ata e dinin çfarë përvoje kishte pasur Bosnja në të cilën NATO kishte ushtruar kompetencat e veta. Ishin shumë të gatshëm të gjenin mënyra”.
Dëshmitari i gjashtë i mbrojtjes, Durkee nis dëshminë në Hagë
Ka filluar dëshmia e një tjetër dëshmitari të mbrojtjes sot në Dhomat e Specializuara në Hagë, pas dëshmisë së Christopher Hill e cila përfundoi gjatë ditës së sotme.
Michael Durkee është dëshmitari i gjashtë i mbrojtjes në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit. Tash oficer në pension, por dikur këshilltar i katër komandantëve të lartë të NATO-s, përfshirë edhe gjeneralin Wesley Clark-un, sipas Nina Tavakolit nga ekipi i mbrojtjes së Hashim Thaçit, Durkee në kuadër të përgjegjësive të tij ka marrë pjesë në një takim mes gjeneralit Clark dhe delegacionit të Kosovës në Rambuje, ku thotë se ku ka komunikuar me Hashim Thaçin.
“Clark dhe Durkee krijuan përshtypjen se udhëheqësit e UÇK-së donin pavarësinë e Kosovës, por nuk kishin një strategji të qartë ushtarake, nuk kishin mundësi të realizonin këtë qëllim”, tha Tavakoli gjersa tregoi pak rreth dëshmisë që do ta paraqesë dëshmitari i mbrojtjes.
Gjithashtu sipas saj, ai do të japë komentet e tij lidhur me dhunën pas luftës që tha se gllabëroi Kosovën në vitin 1999.
“Sipas tij ka qenë një reagim social i shtrirë gjithandej që nuk mund ta kontrollonte as KFOR-i as UÇK-ja, nuk ishte i koordinuar nga lart, por ishte një reagim spontan i motivuar nga dëshira për shpagim, hakmarrje dhe gjakmarrje. Udhëheqja e UÇK-së nuk ishte në gjendje të kontrollonte dhunën sepse emocionet e njerëzve që ishin larguar, ishin aq të forta sa që ishte e vështirë të kontrollohet, por edhe për faktin se UÇK-ja nuk kishte një linjë komanduese të fortë. Sipas Durkee Thaçi nuk kishte asnjë motiv të nxiste dhunën nga ana e UÇK-së, por bëri çdo përpjekje për të zbutuar rastet e dhunës, sepse nëse do të urdhëroheshin akte dhune, sidomos dhunë etnike, kjo rrezikonte marrëdhëniet me ndërkombëtarët që Thaçi kërkonte ta realizonte, pra të kishte një marrëdhënie të mirë me ta”, deklaroi në fillim Tavakoli, rreth asaj që pritet të thotë dëshmitari Durkee .
