Presidentja e Kosovës, Vjosa Osmani ka thënë se Turqia është shtet mik e partner strategjik që i ka qëndruar pranë popullit të Kosovës në çdo fazë. Këtë vlerësim e ka bërë gjatë takimit që ka pasur me kryetarin e Agjencisë Turke për Bashkëpunim dhe Koordinim (TİKA), Abdullah Eren, me të cilin bëhet e ditur se ka diskutuar për thellimin e bashkëpunimit ndërmjet Kosovës dhe Turqisë në fusha të ndryshme zhvillimore.
Bëhet e ditur se e para e shtetit përveç që ka falënderuar atë për kontributin e TIKA-s në Kosovë, për më shumë se dy dekada, ka theksuar se projektet e kësaj agjencie kanë ndikuar në mënyrë të ndjeshme në përmirësimin e infrastrukturës kulturore, arsimit dhe shëndetësisë në vend.
Osmani falënderim të veçantë pati për mbështetjen që kjo agjenci ka pasur në ndërtimin e Qendrës për fëmijë me sindromën Down dhe Autizëm në Prishtinë.
“Në këtë kontekst, Presidentja Osmani e vlerësoi Turqinë si mike dhe partnere strategjike të Kosovës, një shtet që ka qëndruar pranë popullit tonë në çdo fazë, nga periudha pas luftës e deri më sot. Ajo theksoi se miqësia ndërmjet dy popujve është e qëndrueshme dhe e ndërtuar mbi respekt, ndihmë reciproke dhe vlera të përbashkëta”, ka bërë të ditur Presidenca në njoftim.
Gjithashtu, Osmani ka falënderuar këtë agjenci për ndihmën humanitare dhe infrastrukturore të dhënë menjëherë pas luftës, kur, sipas saj, Kosova po rindërtohej nga shkatërrimi, si dhe për restaurimin e objekteve me vlerë historike, që kontribuojnë në ruajtjen e trashëgimisë shumëkulturore të vendit.
“Në përmbyllje, Presidentja theksoi rëndësinë e mbështetjes së iniciativave që lidhen me fëmijët me nevoja të veçanta, ata pa përkujdes prindëror, grupet e margjinalizuara dhe ata që kanë nevojë për përkrahje”, njoftoi Presidenca e Kosovës.
