ATSH/ Më datë 17 nëntor do të mbahet Konferenca e 7-të Ndërqeveritare mes Shqipërisë dhe Bashkimit Evropian në Bruksel, ku do të hapet grup-kapitulli i fundit i negociatave: “Bujqësia, Kohezioni dhe Burimet”.
Kryeministri Edi Rama u shpreh sot se, “Shqipëria e arriti të pamendueshmen, të gjithë kapitujt e negociatave të hapur brenda 12 muajsh, rekord absolut në procesin e integrimeve europiane”.
“Asgjë nuk na dal dot drejt majës së Shqipërisë 2030 në BE. Askush nuk na ndal dot drejt objektivit madhor të mbylljes së negociatave brenda 2027”, theksoi kreu i qeverisë.
Sepse, vijoi ai, “përtej vështirësive, pengesave, dëmtimeve të pashmangshme apo baltës së pandashme, në ngjitjen e kësaj të përpjete historike, ne po e rrisim e forcojmë muaj pas muaji Shqipërinë, me një ekonomi që po rritet, me pensionet që po rriten, me pagën minimale që po rritet, me pagat e tjera që po rriten, me investimet e brendshme e të huaja që po rriten, me mbështetjen për më të dobëtit e për të sëmurët me kancer që po rritet, me investimet e brendshme e të huaja që po rriten, pa rritur asnjë taksë dhe duke përmirësuar hap pas hapi punën e institucioneve të shtetit”.
Rama theksoi se, “Shqipëria punon dhe fiton përditë e më shumë respekt”.
Kryeministri Edi Rama zhvilloi sot një takim me ambasadorët e vendeve të Bashkimit Evropian të akredituar në vendin tonë, por edhe të ardhur nga kryeqytetet fqinje.
Takimi kishte në qendër bashkëbisedimin e përvitshëm pas daljes së Raportit të Progresit të BE për Shqipërinë.
Në progresraportin e vitit 2025 për Shqipërinë vlerësohet angazhimi i autoriteteve shqiptare në procesin e negociatave dhe përmbushjen e kushteve të vendosura nga BE.
Raporti vlerëson përparimin e bërë në procesin e negociatave të anëtarësimit që prej tetorit të vitit 2024, duke theksuar ecurinë e tyre me një ritëm “të paprecedent”, që ka çuar në hapjen e 28 kapitujve brenda një viti.
Në progresraport thuhet se, pas konferencës së dytë ndërqeveritare të 15 tetorit 2024, e cila hapi negociatat e pranimit mbi grup-kapitullin 1, “Themeloret”, u mblodhën katër Konferenca Ndërqeveritare që çuan në hapjen e negociatave mbi katër grup-kapituj.
